Рўйхатга олинмаган улушли қурилиш объектларини реклама қилиш тақиқланади. Тошкент аэропортида хориждан олиб кирилаётган телефонларни божхона расмийлаштируви вақтинча тўхтатилди. Қашқадарёда 3 ёшли қизни машинада унутиб қолдириб, ўлимига сабабчи бўлган боғча раҳбари қамалди. Мактаб ўқувчилари сел босган йўлдан сув кечиб ўтказилгани тасвирланган видео муҳокамаларга сабаб бўлди. Куннинг муҳим янгиликлари билан таништирамиз.
Рўйхатга олинмаган улушли қурилиш объектларини реклама қилиш тақиқланади
Қонунчилик палатаси депутатлари «Кўп квартирали уйларни ва бошқа кўчмас мулк объектларини улуш киритиш асосида қуриш тўғрисида»ги қонунни қабул қилиб, Сенатга юборди.
Қонун лойиҳаси муҳокамаси вақтида маълум қилинишича, ҳужжатнинг 73-моддасида улуш киритиш асосидаги қурилишларни реклама қилиш тартиби белгиланган.
Унга кўра, қурилаётган турар жой мажмуасини ва ундаги хонадонларни реклама қилишга фақатгина қурилиш объектининг лойиҳа декларацияси Ягона ахборот тизимида жойланганидан кейин рухсат этилади.
Агар лойиҳа декларацияси тизимда белгиланган тартибда рўйхатга олинмаган бўлса, қурувчи ва бошқа шахсларга қурилиш объектини ҳам, ундаги хонадонни ҳам реклама қилиш тақиқланади.
Тошкент аэропортида хориждан олиб кирилаётган телефонларни божхона расмийлаштируви вақтинча тўхтатилди
Божхона қўмитаси Тошкент халқаро аэропортида хориждан келаётган йўловчиларнинг мобил телефонлари 30 кунгача экспертиза учун олиб қўйилаётгани ва тезлаштирилган расмийлаштирув учун қўшимча тўлов жорий этилгани ҳақидаги хабарларга муносабат билдирди. Қўмита маълумотига кўра, ҳозир Тошкент халқаро аэропорти орқали олиб кирилаётган мобил қурилмаларнинг божхона расмийлаштируви IMEI идентификаторларини аниқлаш ва уларнинг қонуний олиб кирилганини тасдиқлаш билан боғлиқ масалалар ҳал этилгунига қадар вақтинча тўхтатилган.
Аввалроқ, Ўзбекистон аэропортларида хориждан олиб кирилаётган смартфонларнинг IMEI-кодлари текшируви кучайтирилгани ҳақида хабар берилганди. Айрим маълумотларга кўра, қиймати 1000 доллардан юқори телефонлар 30 кунгача экспертизага олиб қолиниши мумкин. Бу ҳолат Тошкентдаги «Малика» маиший техника бозорида айрим iPhone моделлари нархи 50–400 долларга ошишига ҳам сабаб бўлган. Янги тартибнинг ҳуқуқий асослари ва қўлланиш механизми эса саволлар туғдирмоқда.
