Тадбиркор шакар импорти учун божни олиб ташлашни сўради

Россиядаги нарх ошишига боғлиқ равишда, Ўзбекистонда ҳам охирги 1 ой ичида шакар 2500 сўмга қимматлашди, деди тадбиркор ҳукумат комиссияси билан очиқ мулоқотда. У агар 20 фоизлик бож олиб ташланса, Бразилиядан шакар олиб келишга тайёрлигини билдирди. Бош вазир ўринбосари Жамшид Хўжаев божни бекор қилишга ваъда беролмаслиги, лекин таклиф кўриб чиқилишини айтди.

Фото: Alibaba

Ўзбекистонлик тадбиркор ҳукумат комиссияси билан 14 феврал кунги очиқ мулоқотда шакар импорти учун божни олиб ташлашга чақирди.

“Озиқ-овқат саноатчилари номидан айтаман. Шакар нархи охирги 1 ой ичида 2500 сўмга ошди. Биз шакарни асосан Россиядан оламиз. Россия нархни нега кўтаряпти, билмаймиз, лекин алтернатива бор: Покистон, Ҳиндистон, Бразилия. Илтимос, божни олиб ташласанглар, биз Бразилиядан бемалол шакар олиб келардик”, – деди тадбиркор.

Бош вазир ўринбосари Жамшид Хўжаев бу масала кўриб чиқилишини айтди.

“Қабул қилдик, кўриб чиқамиз. Мен [бож камайтирилиши ёки бекор қилинишига] ваъда бермайман, [лекин] кўриб чиқамиз”, – деди Хўжаев.

Маълумот учун, Ўзбекистонда шакар импортига 20 фоизлик бож ўрнатилган. Бу бож МДҲ эркин савдо режими доирасида Россиядан импортда амал қилмайди.

2025 йил 1 октябрдан бошлаб оқ шакарга нисбатан 20 фоизлик акциз солиғи бекор қилинган эди.

Статистика қўмитасига кўра, 2026 йил январ ойида шакар нархи 1 фоизга кўтарилган. Йиллик нисбатда эса (2025 йилнинг январи билан таққослаганда) шакар 3,7 фоизга арзонлашган.