Самарқанд вилоятининг Пахтачи туманида одамлар ўлими билан боғлиқ ЙТҲ содир бўлди.
Kun.uz’нинг аниқлашича, 9 октябр куни туманнинг Миркан маҳалласида яшовчи эркак скутерни бошқариб бораётиб, Cobalt машинаси билан тўқнашган. Бу пайтда скутерда эркакнинг турмуш ўртоғи ва набираси ҳам бўлган.
ЙТҲ оқибатида 57 ёшли С.А. ва унинг 2 ёшли набираси Х.Ҳ ҳалок бўлган. Скутер бошқарувидаги шахс тан жароҳати олиб, шифохонага ётқизилган. Ҳозирда унинг аҳволи оғир экани айтилмоқда.
Самарқанд вилояти ЙҲХБ ҳолат юзасидан расмий хабар берди.
Аниқлик киритилишича, мазкур ЙТҲ 9 октябр куни соат 13:00 атрофида Пахтачи туманидаги «Миркан» МФЙ ҳудудидан ўтувчи 4К-560 автомобил йўлининг 14-километрида содир бўлган.
ИИБ маълумотига кўра, Cobalt ҳайдовчиси Миркан – Мисит йўналишида ҳаракатланаётган вақтда йўлнинг ўнг томонидан тўсатдан чиқиб қолган велосипедчини уриб юбормаслик учун рулни чапга бурган. Натижада бошқарувни йўқотиб, қарама-қарши йўналишга чиқиб кетган ва ўз йўналишида қатнов қисмининг чап четидан ҳаракатланаётган электроскутер билан тўқнашган.
Ҳодиса оқибатида электроскутерда бўлган бир нафар йўловчи воқеа жойида вафот этган. Ҳайдовчи ва яна бир йўловчи шифохонага ётқизилган. Кўрсатилган тиббий ёрдамга қарамай, йўловчи шифохонада вафот этган.
Маълумот учун, 2026 йилнинг дастлабки 9 ойида мопед ва скутерлар иштирокида 563 та ЙТҲ содир бўлган. Оқибатда 89 киши ҳалок бўлган, 488 киши тан жароҳати олган.
