Ўзбекистон республикаси президентининг 13 майдаги фармонига биноан Тошкент шаҳрида Алишер Навоий номидаги Тошкент Давлат ўзбек тили ва адабиёти университети ташкил этилади. Бу ҳақда УзА хабар берди.

Ҳужжатда айтилишича, университетни ташкил этиш билан боғлиқ қарор ўзбек тили ва адабиётини, унинг тарихий илдизларини ва глобаллашув шароитларидаги ривожланиш истиқболларини чуқур тадқиқ этиш, ўзбек тили ва адабиётини таълим-тарбия тизимининг барча босқичларида ўқитиш, шунингдек, кадрлар тайёрлаш сифатини ўстириш эҳтиёжлари билан боғлиқдир.

Янги олийгоҳ Мирзо Улуғбек номидаги Ўзбекистон Миллий университети Ўзбек филологияси факультети, Низомий номидаги Тошкент давлат педагогика университети Ўзбек тили ва адабиёти факультети ҳамда Ўзбекистон Фанлар Академияси Алишер Навоий номидаги Тил ва адабиёт институти негизида ташкил этилмоқда.

Университет таркибида учта факультет бўлади: Ўзбек филологияси, Ўзбек тили ва адабиётини ўқитиш, Ўзбек-инглиз таржимаси. Бундан ташқари, олийгоҳ ҳузурида ўзбек тили ва адабиёти Илмий-тадқиқот институти ишлайди.

Фанлар Академиясининг Алишер Навоий номидаги адабиёт музейи ҳам янги университет таркибига кириб, унинг асосида Ўзбек тили ва адабиёти музейи ташкил этилади.

Олийгоҳ филологлар, илмий-педагогик кадрлар, юқори малакали таржимонлар етиштириб беради, илмий-тадқиқот фаолиятини юритади, соҳа мутахассисларини қайта тайёрлаш ва уларнинг малакасини ошириш билан шуғулланади, шунингдек, кўрсатилган йўналишлар бўйича илмий ва ўқув-методик материаллар тайёрлаб беради.

Университетнинг асосий вазифалари этиб қуйидагилар белгиланди:
 - ўзбек тили ва адабиётини, унинг ўзига хос хусусиятлари, илмий-назарий, фалсафий-эстетик асосларини, замонавий таълим технологияларини чуқур ўзлаштирган, давр талабларига жавоб берадиган юксак малакали илмий ва педагог кадрлар тайёрлаш;
- илмий, бадиий ва бошқа соҳалардаги адабиётларни ўзбек тилидан инглиз ва бошқа хорижий тилларга, шунингдек, жаҳон тилларидан она тилимизга юксак сифат ва маҳорат билан таржима қиладиган таржимонлар тайёрлаш;
- талаба ёшларни, ўзбек тили ва адабиётининг бой имкониятларидан фойдаланган ҳолда, Ватанга муҳаббат ва садоқат, умумбашарий қадриятларга ҳурмат руҳида, кенг дунёқарашга эга бўлган ва мустақил фикрлайдиган, маънавий етук инсонлар этиб тарбиялаш;