Актёрнинг оиласи ижтимоий тармоқларда эълон қилган баёнотда Стюарт сўнгги пайтларда Алцгеймер касаллиги ва Леви таначалари билан боғлиқ деменциядан азият чеккани айтилган. Унинг сўнгги кунларида рафиқаси ва яқинлари ёнида бўлган.
Патрик Стюарт 1940 йилда Англиянинг Ғарбий Йоркшир графлигида туғилган. Актёрлик фаолиятини ёшлигидан бошлаган ва 1966 йилда нуфузли Қироллик Шекспир театри труппасига қўшилган.
Унга жаҳон миқёсидаги шуҳратни «Юлдузли йўл: Кейинги авлод» сериалидаги капитан Жан-Люк Пикар роли олиб келган. Кейинчалик актёр «Икс одамлар» филмларида профессор Чарлз Ксавьер образини гавдалантириб, янада кенг аудиторияга танилган.
2010 йилда Буюк Британия қироличаси Елизавета II Стюартни рицарлик унвони билан тақдирлаган.
Стюарт актёрликдан ташқари ижтимоий масалалардаги фаоллиги билан ҳам танилган. У оилавий зўравонлик муаммосига ва уруш фахрийларининг руҳий саломатлигига жамоатчилик эътиборини қаратишга ҳаракат қилган. Шунингдек, қочқинларни қўллаб-қувватлаган ва ҳайвонлар ҳуқуқларини ҳимоя қилган.
«Юлдузли йўл»да капитан Жеймс Кирк ролини ижро этган канадалик актёр ва ёзувчи Уилям Шетнер ҳамкасбининг вафоти муносабати билан X ижтимоий тармоғида ҳамдардлик билдирган.
«Сэр Патрик Стюарт дўст, ҳамкасб ва ажойиб актёр эди. Театр саҳнасидан тортиб “Энтерпрайз” кемасининг капитанлик кўпригигача у ақл-заковат, нафосат ва чуқур инсонийликни намоён этди», — деб ёзган Шетнер.
Унинг таъкидлашича, капитан Пикар инсондаги энг яхши фазилатларни ўзида мужассам этган ва бу образни яратган Стюартнинг ўзи ҳам шундай инсон бўлган. Шетнер марҳумга ва унинг ижодига чексиз меҳр ҳамда ҳурмат билан қараганини билдирган.
