Мадриднинг «Атлетико» жамоаси ярим ҳимоячиси Коке ўз жамоадошларини «Реал»га қарши кечган ўйиндаги мағлубиятни имкон қадар тезроқ унутишга чақирди.
Диего Симеоне шогирдлари Испания чемпионатининг 12-тури доирасида «қаймоқранглилар»га қарши майдонга тушган ва 0:3 ҳисобида мағлубиятга учраганди.
«Биз ортга эмас, олдинга қараб интилишимиз лозим. Албатта бу мағлубият оғир бўлди, бироқ яна муваффақият қозонамиз, чунки бизда жуда кучли футболчилар тўпланган», — дея Кокенинг сўзларини келтирган Football Espana.
Бундан ташқари, футболчи Роналду билан мунозараси ҳақида ҳам гапириб ўтган. У бу тортишувга жиддий эътибор бермасликни сўраган.
«Криштиану Роналду билан гап талашганимми? Бу футбол, спортда бундай ҳодисалар бўлиб туриши табиий ҳол. Ҳаммаси жойида», — деган Коке.
21 ноябрь куни Испаниядаги Cope радиоси дерби вақтида Коке ва Роналду ўртасидаги жанжалга эътибор қаратди. Унга кўра, Коке португалиялик футболчини ҳезалак дея ҳақоратлаган, ва шундай жавоб олган: «Агар Мадридда учрашиб қолсак, сени нима қилишимни кўрасан. Балки мен ҳезалакдирман, аммо банкдаги ҳисобим ҳақида сен фақат орзу қилишинг мумкин, эшак».
«Атлетико» айни вақтда 21 очко билан турнир жадвалининг 6-ўрнида қолмоқда.