Россия Ўзбекистонга божсиз нефть етказиб беришни рад этди

Россия «Омск-Павлодар-Чимкент-Зафаробод» қувури бўйича нефтни юбориш учун техник имкониятларни топа олмаган. Бу ҳақда «Интерфакс» агентлиги РФ энергетика вазирлиги вакилига асосланган ҳолда хабар қилмоқда. 

Россия энергетика вазирлиги вакилининг сўзларига кўра, 2016 йил ноябрь ойида Ўзбекистон ҳукумати Россия нефтини нефть қувури орқали экспорт божхона тўловларисиз етказиб беришни ташкил этиш бўйича Россия ҳукуматига мурожаат қилган.

Агентликка кўра, Ўзбекистон мактубда аниқ ҳажм ҳақида сўз юритмаган. 

Россия иқтисодий тараққиёт вазирлигининг қайд этишича, Россия Жаҳон савдо ташкилотига аъзо мамлакат сифатида нефть божини бекор қила олмайди. Агар Россия Ўзбекистонга экспорт божларини бекор қилса, у ЖСТга аъзо мамлакатларнинг барчасига бекор қилиши лозим бўлади. 

Бундан ташқари, айни вақтда, Россия нефтини «Омск-Павлодар-Чимкент-Зафаробод» йўналиши бўйича қувур транспорти орқали Ўзбекистонга етазиб бериш техник томондан имкони йўқ, деб таъкидлаган Россия энергетика вазирлиги вакили. 

Шу билан бирга, «Россия нефть компанияларининг Ўзбекистонга нефть етказиб бериш бўйича аризалари ҳам келиб тушмаган», - дея қўшимча қилган вазирлик вакили.