Оқ уй маъмурияти Трампнинг кенжа ўғлини тинч қўйишга чақирди

АҚШ маъмурияти, Америка жамоатчилиги "мамлакат анъаналарига мувофиқ ҳолда" президентнинг 10 ёшли ўғли Бэррон Трампни тинч қўйишига умид билдирмоқда.

"Бу аввалдан давом этиб келаётган анъана, президент фарзандларига (уларга) сиёсий эътибор берилмасдан улғайиш имкони тақдим этилади. Оқ уй бу анъана давом этишини кутиб қолади. Биз сизнинг бу масалада ҳамкорлик қилишингизни қадрлаймиз", — дейилади Оқ уй матбуот хизмати хабарида. 

Ўтган кунлар мобайнида Дональд ва Мелания Трампнинг ўғли Бэррон АҚШ ОАВнинг нишони бўлди. 

Хусусан, NBC телеканалининг "Saturday Night Live" шоуси сценарийнависи Кэйти Рич Twitter микроблогида АҚШ янги президентининг 10 ёшли ўғли ҳақида ҳақоратомуз сўзларни қолдиргани сабабли ишдан бўшатилди. Трампнинг инаугурацияси чоғида Мелания ўғлининг қўлидан ушламоқчи бўлганида кескин рад этган эди. Шундан сўнг, Рич микроблогида: "Бэррон мамлакатимизнинг биринчи мактаб мергани бўлади", - деб изоҳ қолдирганди. Кейинроқ, журналист аёл бунинг учун узр ҳам сўраган. 

Бундан ташқари, қатор телеканаллар, Трамп Овал хонада илк фармонларини имзолаётган вақтда Бэррон жияни билан ўйнаётганига эътибор қаратган эди.