АҚШ Олий суди раиси Жон Робертс 21 август, жума куни қуйи инстанция судларининг Оқ уйдаги қурилиш ишларини тўхтатиш ҳақидаги қарорларини вақтинча блоклади. Бу эса Трамп маъмуриятига реконструкцияни давом эттириш имконини берди.
Бундан аввал Вашингтондаги федерал апелляция суди президент маъмуриятининг Оқ уйда кенг кўламли қурилиш ишларини давом эттиришини тақиқлаган эди. Суд фикрича, амалдаги маъмурият президентнинг шахсий хоҳишларига мувофиқ Оқ уйни қайта режалаштириш ва реконструкция қилиш учун «чекланмаган ваколатларга» эга эмас.
Трамп маъмурияти мазкур қарор устидан шикоят қилди. Президент Доналд Трампнинг таъкидлашича, бал зали ва ҳарбий бункердан иборат янги мажмуа «ўз туридаги энг буюк иншоот» бўлади. У, шунингдек, бункер қурилиши мамлакат миллий хавфсизлиги учун муҳим эканини билдирган.
Трамп Оқ уйдаги кенг кўламли реконструкцияни Конгресс розилигисиз бошлаган. Ўтган йили у янги бал зали ва бункер учун жой очиш мақсадида Оқ уйнинг тарихий Шарқий қанотини бузиш бўйича кўрсатма берган эди.
AFP агентлигига кўра, мазкур қурилиш Трампнинг иккинчи президентлик муддати 2029 йил январда якунлангунига қадар Вашингтон қиёфасини ўзгартиришга қаратилган бир нечта йирик лойиҳаларидан бири ҳисобланади.
Жумладан, АҚШ президенти Оқ уй яқинидаги кўл ҳудудини ҳам реконструкция қилишни режалаштирган. У ерда баландлиги 76 метр бўлган улкан зафар аркасини қуриш кўзда тутилмоқда. Таъкидланишича, режалаштирилаётган иншоот Берлиндаги машҳур Бранденбург дарвозасидан қарийб уч баравар баланд бўлади.
Олий суднинг сўнгги қарори реконструкциянинг қонунийлиги бўйича баҳсни тўлиқ якунламайди. Бироқ у ҳозирча Трамп маъмуриятига Оқ уйдаги қурилиш ишларини давом эттириш имконини беради.
