Доналд Трамп президентликка қайта сайлангандан бери унинг жамоасида матбуот котиби сифатида ишлаб келаётган ва Оқ уй тарихида бу лавозимни эгаллаган энг ёш кадр Керолайн Левит август охирида фаолиятига нуқта қўйишини эълон қилди.
Президент Трамп ҳам ўзининг ижтимоий тармоқдаги саҳифаларида буни тасдиқлаб, Керолайн бундан буёғига вақтини кўпроқ фарзандлари ва оиласи билан ўтказишини ёзди. Шунингдек, Керолайн ҳаммасини яхши қилгани, унинг ишидан миннатдорлигини қўшимча қилди.
"Керолайн энди менинг энг яхши ташқи маслаҳатчиларимдан бири ва Республикачилар партияси ичидаги таъсирли овоз бўлади, чунки биз тарихга қарши чиқиш ва оралиқ сайловларда қатъий ғалаба қозониш учун ишлаймиз", деб ёзди Трамп Truth Social саҳифасида .
Левит эса Оқ уй номидан гапириш имконини бергани учун президентга раҳмат айтди. Ушбу лавозим унинг учун шараф ва саргузашт бўлгани, аммо май ойида фарзанд кўргани боис миясида яхши она бўлолмаётгани айланаётганини қўшимча қилди. Оқ уй матбуот котиби бўлиш эса тинимсиз меҳнат, ҳаракат, куч ва эътибор талаб қилади, дейди у.
Трампнинг энг ишонган мулозимларидан бири оралиқ сайловларга 3 ой қолганида лавозимини тарк этмоқда. Керолайн Левит медиа ичида Трамп ғоялари қаттиқ ҳимоячиси, MAGA пропагандачиларидан эди.
Эслатиб ўтамиз, июнь охирида АҚШ Миллий разведка директори Тулси Габбард, март ойида эса ички хавфсизлик департаменти раҳбари Кристи Ноэм, апрелда АҚШ бош прокурори Пам Бонди истеъфо берганди.
