Мессининг дубли «Барселона»ни навбатдаги муваффақиятсизликдан қутқариб қолди. Гарет Бейлуч ойлик танаффусдан сўнг сафга қайтиб, дарҳол самара келтиришни бошлади. Англия кубоги чорак финалида Конте ва Моуриньо қарама-қаршилиги юзага келди. Tribuna.Uz уик-энднинг шу каби энг эътиборли воқеаларини эслаб ўтади.
Инқироздаги «Барселона» ва Месси
ЕЧЛдаги шармандали мағлубиятдан кейин «Барселона» Испания чемпионатида ҳам ўта мазмунсиз ўйин намойиш этди. Фақатгина Мессининг саъй-ҳаракатлари эвазига жамоа лиганинг мутлақ дебютанти, аутсайдерини сўнгги дақиқалардагина мағлубиятга учратишни уддалади. Ҳамон янги шартнома бўйича муаммолар бўлишига қарамасдан, Месси ҳозирча жамоасини мураккаб вазиятдан олиб чиқиб кетиш учун жон куйдирмоқда.
«Реал»да эса барчаси изга тушиб бормоқда. Уч ойлик танаффусдан сўнг жамоанинг энг қимматбаҳо футболчиси Гарет Бэйл сафга қайтди ва қайтган ўйинидаёқ гол уриб жамоасининг ғалабасига муносиб ҳисса қўшди. Бу билан жамоанинг муваффақиятлари чекланиб қолмайди. «Реал» мана 42 учрашувдирки, рақиблар дарвозасини ишғол қилиб келмоқда. Сўнгги марта «Манчестер Сити» 2016 йилнинг апрелида мадридликларга қарши қуруқ ўйин ўтказишга муваффақ бўлганди.
Испанияда бу турда бошқа етакчилар ҳам ғалаба қозонди. Кевин Гамейронинг 5 дақиқада қайд этган супер натижаси «Атлетико»га ғалаба келтирган бўлса, «Вильярреал» сўнгги дақиқадаги ҳаракати эвазига уч очкони қўлга киритди. «Севилья» эса «Барселона» ва «Реал»дан ортда қолиб кетмаслик учун навбатдаги муваффақиятли юришини амалга оширди.
Яна Моуриньо-Конте тўқнашуви
Премьер-лига ўйинлари ҳафталик таътилга чиққан пайтда Англия кубоги нимчорак финал учрашувлари ўтказилди. 136 йиллик тарихга эга турнир бу сафар ҳам ўзининг сюрпризлари билан ажралиб турибди. Амалдаги АПЛ чемпиони «Лестер»нинг қуйи дивизион жамоасига бир киши кўп бўлиб ҳам ютқазиши, Гвардиола «Сити»сининг чемпионшип вакилини юта олмаслиги...
Лекин энг асосий сенсация шанба куни кузатилди. Кубок тарихида 103 йилдан буён кузатилмаётган натижа рўй берди. Кубок чорак финалида илк марта ҳаваскорлар лигасидан жамоа иштирок этадиган бўлди. Энг қизиқ томони, агар бугун бўлиб ўтадиган «Саттон» - «Арсенал» учрашувида «Саттон» мўъжиза кўрсатиб ғалаба қозона олса, Англия футболида мисли кўрилмаган тарихий воқеа кузатилиши мумкин. Аниқроқ айтадиган бўлсак, муҳташам «Уэмбли» мезбонлик қиладиган кубок ярим финалида илк марта ҳаваскор жамоа тўп суриши мумкин. Чорак финал қуръаси шундай имконият эҳтимолини тақдим этди.
Дарвоқе, қуръа ҳақида нимчорак финалда «Блэкберн»дан устун келган «МЮ» чорак финалда «Челси» меҳмони бўлади. Фантастик формага кирган Ҳарри Кейн ва «Тоттенҳэм»га бу сафар ҳам нисбатан осонроқ рақиб дуч келади.
Инқилоб арафасидаги Италия
«Ювентус»нинг навбатдаги ғалабасидан кейин чемпионлик учун деярли интрига қолмаган бир вазиятда Италия футбол Иттифоқи кутилмаган баёнот билан чиқди. Мамлакатда янги мавсумдан бошлаб видеотакрорлар тизимидан фойдаланиш йўлга қўйилади. ФИФА рухсат берса бўлди.
Чемпионлик учун кураш кечмаётган бўлсада, кейинги ўринлар, еврокубок йўлланмалари учун жуда кескин рақобат юзага келмоқда. Бу турда Марадонага яқинлашиб қолган Ҳамшик бошчилигидаги «Наполи», шунингдек «Рома», «Интер» ва «Милан» жамоаларининг барчаси ғалаба қозонди. Буёғига кескин рақобат кафолатланмоқда.
Тарихга кирган Беларабий ва таслим бўлмаётган «Лейпциг»
Европа Чемпионлар лигасидаги муваффақиятли юришдан кейин «Бавария» чемпионатда муаммога дуч келди. Можароли учрашувда мюнхенликлар «Ҳерта» дарвозасини 96-дақиқада ишғол қилди. Ваҳоланки ўйинга 5 дақиқа қўшиб берилганди. Бу берлинлик мухлисларга ёқмади ва улар жамоа бош мураббийини ҳақорат қилишди. Ҳамиша оғир, босиқлиги билан ажралиб турадиган Карло Анчелотти эса бу сафар ёшига ярашмайдиган қилиғи билан матбуотда ном чиқарди.
«Бавария»нинг очко йўқотишидан «Лейпциг» унумли фойдаланди. Ҳазенхтюттл шогирдлари бу сафар Мёнгхенгладбахдан ғалаба билан қайтди. Шунингдек, бу турда Дортмунднинг «Боруссия»си ҳам муваффақият қозонди.
Бундеслиганинг асосий воқеилиги эса жума тунида содир бўлганди. «Байер» футболчиси Карим Беларабий жамоаси ғалаба қозонган ўйинда, бундеслигадаги юбилей голга муаллифлик қилди.
Оқсаётган пешқадамлар ва «Ницца»
Франция чемпионатининг бу турида ЕЧЛда иштирок этаётган икки пешқадам очко йўқотди. «Монако» «Сити»га қарши учрашувдан олдин «Бастия» меҳмони бўлиб дуранг ўйнаган бўлса, «Барселона» билан учрашувдан эйфорияда юрган «ПСЖ» «Тулуза» уйида қабул қилиб, нурсиз натижа қайтди. Бундан эса «Ницца» фойдаланиб қолди. Балотелли қизил карточка олишига қарамай, жамоа меҳмонда ғалаба қозонди. Эндиликда пешқадам «Монако»дан «ПСЖ» ва «Ницца» 3 очкога ортда қолмоқда. Чемпионлик учун кураш давом этади.
Ўзимизда
Ҳафта охири нафақат Европада балки Ўзбекистонга алоқадор бўлган қизиқарли воқеаларга бой бўлди. Темурхўжа Абдухолиқов Қатарда навбатдаги голини киритди. Терма жамоа таркибида гол киритишни унутиб қўйган Игорь Сергеев эса «Арсенал» Тулага қарши ўйинда кулгили вазиятга тушиб қолди. Энг асосий муваффақиятсизлигимиз эса футболда эмас, сўнгги вақтларда мақтана бошлаганимиз боксда кузатилди. Олимпиада ўйинларининг тўртта совриндори билан Қозоғистонга ташриф буюрган Uzbek Tigers мезбонлардан қақшатқич зарба қабул қилиб олди.
