Pagani асосчиси махсус Ferrari суперкарини намойиш қилди

Суперкарлар ишлаб чиқаришга ихтисослашган Pagani фирмаси асосчиси Горацио Пагани Маранеллодаги Ferrari заводидан F12tdf суперкарининг махсус ишланган намунасини қабул қилиб олди. Автомобиль Пагани буюртмаси асосида ягона нусхада ишлаб чиқилган. Ушбу машинанинг илк суратлари февраль ойи бошларида пайдо бўлган эди. 

Махсус Ferrari F12tdf суперкарини ишлаб чиқиш билан компаниянинг алоҳида буюртмаларини етказиб берувчи Tailor-Made бўлими шуғулланган. Автомобиль кузови ҳам ўзига хос тарзда бўялган, янги дисклар қўйилган. Бундан ташқари, машина салонига суперкар Горацио Пагани буюртмаси асосида ишлаб чиқилгани ёзилган.

F12tdf купеси — бу F12berlinetta моделининг кучайтирилган намунаси бўлиб, унга 780 от кучига эга 12 цилиндрли, 6.3 литр ҳажмли двигатель ўрнатилган. Автоматик узатмалар қутисига эга машина 2,9 сонияда «юз»га чиқади. Унинг энг юқори тезлиги соатига 340 кмни ташкил этади. Дунё бўйича F12tdf купесидан жами 799 дона ишлаб чиқилган.

Ажойиб спорткарларга қизиқувчи Пагани январь ойида Porsche 911 R спорткарини харид қилган эди. Тадбиркор машинасини олиш учн дилерга шахсан борганди.