Samsung раҳбарига нисбатан суд қачон бошланиши маълум

Samsung корпорациясининг ҳақиқий раҳбари Ли Чжэ Ён иши бўйича биринчи эшитувлар 9 март куни бошланади. У Жанубий Кореяда 2015 йилда компаниянинг икки филиали бирлашиши давомида пора олганликда гумонланмоқда, деб хабар берди Reuters агентлиги суд баёнотига асосан.

Аввалроқ Жанубий Корея суди прокуратуранинг Ли Чжэ Ённи ҳибсга олиш ҳақидаги мурожаатини тасдиқлади, шундан сўнг у қамоққа олинди. Samsung раҳбарияти эса махсус баёнот билан чиқди. Унда компания “бўлажак суд жараёнида барча ҳақиқат аниқланиши учун қўлидан келган ҳамма ҳаракатни бажариши” айтилган.

Терговга кўра, айнан Ли Чжэ Ён мамлакат президенти Пак Кин Хенинг яқин дугонаси – Чхве Сун Силга молиявий кўмак бериш ҳақида қарор қабул қилган. Бу ҳукумат томонидан маълум енгилликлар берилиши эвазига қилинган. Хусусан, корпорация Чхве Сун Сил ва унинг қизига тегишли бўлган ҳамда Германия рўйхатдан ўтган фирма ҳисоб рақамига бу компания томонидан гўёки кўрсатилган консультация хизматлари эвазига 18 млн доллардан кўпроқ маблағни ўтказиб берган. Шунингдек Чхве Сун Силь томонидан ташкил этилган нодавлат жамғармаларга йирик миқдорда маблағлар ўтказилган. Терговчиларнинг фикрича, Samsung бунинг эвазига, акциялари давлат пенсия жамғармаси томонидан бошқарилган бир қатор бўлинмаларининг қўшилишини амалга оширишда қўллаб-қувватланган.