DW хабарига кўра, тегишли талаб 22 октябр куни Страсбургда қабул қилинган, Россия ҳужумларининг кучайиши ва Қора денгизда кема қатнови хавфсизлигига бағишланган резолюцияга киритилган.
Таклифни овоз бериш пайтида сўл фракция вакили, нидерландиялик депутат Аня Хазекамп оғзаки тарзда илгари сурган. Якуний матнда Европарламент сувсар мўйнаси импортига тақиқ бекор қилинганидан афсус билдириб, Европа Иттифоқи кенгаши ва Еврокомиссияни чекловни тиклашга чақирган.
Бу чақириқнинг ўзи тақиқ қайта кучга кирганини англатмайди. Хабарга кўра, Брюссел ҳозир Россияга қарши 22-санкциялар пакетини тайёрламоқда.
Овоз беришдан кейинги муҳокамада халқаро ҳамкорлик бўйича еврокомиссар Йозеф Сикела истиснони ЕИнинг айрим давлатлари талаб қилганини айтган. Улар ўз мўйна саноати Россия хомашёсига боғлиқлиги ва уни бошқа мамлакатлардан етказиб бериш билан алмаштириш имкони йўқлигини асос қилиб келтирган.
Сикеланинг таъкидлашича, Россия мўйналари, жумладан, сувсар мўйнаси импортини тақиқлашни дастлаб Еврокомиссия таклиф қилган. Чеклов апрелда жорий этилган, июлда эса барча 27 аъзо давлат сувсар учун истисно қилишга бир овоздан рози бўлган.
Еврокомиссар қайси давлатлар буни сўраганини очиқламаган. У санкцияларни ўзгартириш учун ЕИ кенгашида барча аъзо мамлакатларнинг розилиги кераклигини, тақиқни тиклаш ҳам худди шу тартибга боғлиқлигини билдирган.
Европарламентдаги энг йирик фракция — Европа халқ партияси номидан гапирган полшалик Кшиштоф Брейза истиснони танқид қилган. Унинг фикрича, Россия иқтисодиётига тушаётган ҳар қандай маблағ урушни молиялаштиришга хизмат қилади, санкциялардан ҳар бир истисно эса Путинга заифликни намойиш этади.
«Европани янгилаш» либерал фракцияси вакили, финландиялик Катри Кулмуни сувсар мўйнасининг деярли барчаси Россияда ишлаб чиқарилишини ва импорт Греция ҳамда Италия корхоналари учун муҳимлигини тан олган. Бироқ у бу ҳолат санкцияларни юмшатишни оқламаслигини айтган.
Кулмуни Финландия ҳам Россия билан савдо ва туризм тўхташи оқибатида катта иқтисодий йўқотишларга учраганини эслатган. Унинг таъкидлашича, мамлакатлар санкцияларни фақат қийинчилик бошқаларга тегишли бўлган пайтдагина қўллаб-қувватлаши тўғри эмас.
