Нью-Йоркда полиция ва кўнгиллилар бедарак йўқолган ўзбекистонлик фуқарони қидирмоқда

Америка Қўшма Штатларининг Нью-Йорк шаҳрида 3 август куни ўзбекистонлик фуқаро бедарак йўқолди. У АҚШга ўз қариндошларини кўриш учун келганди, деб ёзмоқда 1news.uz.

1958 йилда туғилган Собир Аҳмедов Тошкентдан Нью-Йоркка Оҳайода яшовчи қариндошларини кўриш учун учиб келган. Аҳмедовнинг қизи илтимосига кўра, уни аэропортда такси ҳайдовчиси кутиб олган ва Чайна-Таундаги автобус бекатига олиб бориб қўйган. Бу ердан Собир Аҳмедов автобусда Оҳайодаги қариндошлари олдига жўнаб кетиши лозим бўлган.

Аҳмедов автобусга чипта харид қилганидан сўнг, таксичи кетган, Аҳмедов эса бекатда ўзбекистонлик яна бир фуқаро билан қолган. Орадан бироз вақт ўтиб, Собир Аҳмедов автобус бекатидан айланиб келиш мақсадида чиққан ва ортга қайтиб келмаган.

Бу ҳақда Оҳайога йўл олаётган ўзбекистонлик яна бир эркак дарҳол хабар берди.

Маълумотларга кўра, Аҳмедов Нью-Йоркда расмий қидирувга берилди, полиция уни қидирмоқда.

Ўзбекистонлик кўнгиллилар гуруҳи эса куни кеча Чайна-Таунга бориб, ушбу эркак бедарак йўқолгани ёзилган эълонларни осиб чиқишган.