«Ўқдан қочишга жой топилмади». АҚШ тарихидаги энг йирик оммавий қотилликни ким содир этди?

Кейинроқ унинг шахси аниқланди, бу 64 ёшли пенсионер Стивен Пэддок эди. Пэддок 28 сентябрь куни «Мандалай Бэй» меҳмонхонасидан хона олганди.

Аввалига ИШИД Пэддокни ўз аскари деб атаб, ҳужум учун жавобгарликни ўз зиммасига олди. Пэддок бир неча ой олдин ислом динини қабул қилгани ҳам қўшимча қилинди. Аммо кўп вақт ўтмасдан Федерал қидирув бюроси қотил ва жангарилар ўртасида ҳеч қандай алоқалар йўқлигини маълум қилди. 

Шу билан бирга америкалик бу пенсионер ҳужумни уюштиришдан аввал ҳеч қандай талабларни илгари сурмаган, унда қонун билан боғлиқ муаммолар бўлмаган, у алкоголик ёки наркотик ҳам эмасди.

Уни жиноятга ундаган сабаблар сирлигича қолмоқда. «Мен бу жиннининг бошида не ўй бўлганини била олмайман», — дея қайд этган полиция шерифи журналистлар билан мулоқот вақтида.

Ҳисобчи ва учувчи. Муқаддам судланмаган
Полиция маълумотига кўра, Стивен Крэйг Пэддок — 64 ёшли АҚШ фуқароси. У 1953 йилнинг апрелида туғилган. Полиция у қуролли кучлар фахрийси экани ҳақидаги хабарларни инкор этди.

Унинг ижтимоий тармоқлардаги саҳифаси аниқланмади. Ижтимоий тармоқларда Пэддокнинг сурати экани айтилган суратлар тарқалганди, аммо бу маълумот тасдиғини топмади.

ABC News телеканали маълумотига кўра, Стивен аудитор ва бухгалтер бўлиб ишлаган, у маълум муддат Мудофаа вазирлиги учун кўчмас мулк топиб бериш билан шуғулланувчи пудратчи фирмада ҳам фаолият юритган. Унинг қариндошлари Пэддок тез-тез ишдан бўшатилгани ҳақида айтишди, уни нега ишдан бўшатишгани сабаблари келтирилмади.

Очиқ маълумотларга кўра, Пэддок 27 марта тураржойини ўзгартирган, у Флорида, Невада, Техас ва Калифорния штатларида яшашга улгурган. 2016 йил ёзида у 17 минг аҳолига эга Мескит шаҳарчасида (Невада штати) истиқомат қила бошлаган. Мескит — асосан кексалар яшайдиган шаҳарча бўлиб, унда гольф майдони ва кичик казино кекса кишиларни қизиқтирган. Бу Лас-Вегасдан 130 километр узоқликдаги шаҳарча (бу масофани машинада 1 соату 15 дақиқада босиб ўтиш мумкин).

Пэддок ҳеч қачон судланмаган. Аммо ҳуқуқ тартибот органлари ходимлари у кўп марта автомобил бошқаришда ҳуқуқбузарликлар содир этганини аниқлашди. Мескит полицияси ҳам Стивенда қонун билан муаммолар бўлмаганини тасдиқлади.

Пэддок камида бир марта казино билан судлашган. 2013 йилда у кўнгилочар хизматлар кўрсатувчи Cosmopolitan Hotels & Resorts Inc. компанияси билан судлашган, у компанияни ноқулай шароитлар туфайли ўзи йиқилиб жароҳатланишига сабабчи сифатида айблаганди. Аммо даъво рад этилган.

У 2003 йилда хусусий учишларни амалга ошириш лицензиясига эга бўлган, унга бир моторли самолётларда учишга рухсат бор эди. У охирги марта 2008 йил февралида тиббий кўрикдан ўтганди. Пэддокда икки самолёт бор эди. Унинг самолётлари турадиган аэропорт директори бу мижози билан муаммолар бўлмаганини айтди: «У ҳамиша барча ҳужжатларни тўғри олиб борган». Пэддок овчилик лицензиясига ҳам эга эди, у Аляскада яшаганида бунга ҳуқуқни қўлга киритган.

Оилавий низолар ҳақида маълум эмас. Лас-Вегас «мергани»нинг укаси Эрик Пэддок бу воқеадан шок ҳолатига тушганини айтиб берди: «Худди бизнинг оиламизга астероид қулагандек». Эрикнинг ишонтириб айтишича, акаси диндор ҳам бўлмаган, сиёсатга ҳам қизиқмаган. «Қандайдир воқеа уни издан чиқарган кўринади», — дея қўшимча қилган Эрик.

Эрикнинг сўзларига кўра, Стивен Пэддок «Мескитда яшаган ва Лас-Вегасга кўнгилхушлик қилиш учун келган одатдаги йигит» эди. Ҳуқуқ тартибот органлари маълумотларига кўра, кейинги ҳафталарда у казинода бир неча марта катта маблағ тикканди.

Пэддок хотини билан ажрашган. Унинг шахсий ҳаётидаги бошқа жиҳатлар ҳозирча маълум эмас.

Business Insider нашри ёзишича, Стивен Пэддокнинг отаси узоқ вақт давомида қидирувда бўлган. 1969—1977 йилларда Бенжамин Хоскинс Пэддок АҚШдаги энг хавфли жиноятчилар рўйхатига кирган.  Шифокорлар катта Пэддокни расман ўз жонига қасд қилишга мойил бўлган психопат деб тан олган, у банкларни ўмарган ва автомобилларни олиб қочган. Аризонадаги банкларга уюштирилган бир нечта қуролли ҳужумлардан сўнг у судга берилган ва 20 йилга қамалган. Аммо 1969 йилда катта Пэддок қамоқдан қочган ва узоқ вақт давомида қидирувда бўлган.

1980 йилларда у гўёки янги ҳаёт бошламоқчи бўлган, бироқ охир-оқибат унинг товламачилиги фош қилинган. Бир неча йил аввал катта Пэддок вафот этган.

Дастлабки маълумотларда Пэддокнинг ёнида бир аёл ҳам бор бўлгани айтилди. Ҳодиса рўй бергач, Мэрил Дэнли қидирувга берилди. Унинг сурати департамент твиттерида эълон қилинди.

Дэнли 62 ёшда бўлган. Полиция маълумотига кўра, у 2017 йил январидан бошлаб Мескитда Стивен Пэддок билан бирга яшай бошлаган. Бунгача Арканзас, Теннеси ва Оҳайо штатларида истиқомат қилиб келган.

Пэддокдан фарқли равишда Дэнли ижтимоий тармоқларнинг фаол фойдаланувчиси бўлган. У ўзини бир неча ўринда «она ва буви эканидан фахрланиши»ни айтиб ўтган.

LinkedIn маълумотига кўра, у ўтмишда казиноларда ишлаган, жумладан, Невададаги казинода ҳам.

CNN телеканали хабар қилишича, кейинроқ Дэнли шу куни Филиппинда бўлганини тасдиқлади. Уни АҚШга тергов учун қайтариш бўйича ҳаракатлар бошланган.

Трамп ва ўқотар қуроллар
Лас-Вегас шаҳри жойлашган Невада штатида қонунлар юмшоқ. Исталган киши қурол кўтариб юриши мумкин. Маҳаллий аҳоли қуролга рўйхатдан ўтказмасдан эгалик қилиши, хусусий тартибда қурол сотиб олиши мумкин.

Матбуот АҚШ президенти Дональд Трамп бу борадаги қонунни қаттиқлаштиришга ҳаракат қилмаганига эътиборни жалб этмоқда.

Трамп твиттерда фожиага муносабат билдирди: "Лас-Вегасдаги қўрқинчли воқеада қурбон бўлганларнинг яқинларига чуқур ҳамдарлик билдираман. Аллоҳ паноҳида асрасин". Президент Невадага боришга ваъда берди.

У ушбу фожиа муносабати билан 5 кунлик мотам эълон қилди. Мотам 6 октябрь, жума кунигача давом этади.

Отишма қурбонларига ҳурмат рамзи сифатида АҚШ байроғи Оқ уй ва федерал ҳукуматнинг барча биноларида туширилади.

Шунингдек, Трампнинг кўрсатмасига биноан мамлакат миллий байроғи АҚШ элчихоналари, расмий ваколатхоналари, консуллик муассасалари ва хориждаги бошқа объектлар, жумладан, ҳарбий объектлар ва ҳарбий-денгиз кемаларида ҳам туширилади.