Трамп Кеннедининг ўлдирилиши билан боғлиқ барча ҳужжатларни ошкор қилишга ваъда берди

АҚШ президенти Дональд Трамп АҚШнинг 35-президенти Жон Кеннедининг ўлдирилиши билан боғлиқ барча ҳужжатларни ошкор қилишга ваъда берди.

"Генерал Келли (Оқ уй аппарати раҳбари Жон Келли), МРБ ва бошқа идоралар билан жиддий муҳокамадан кейин ҳозирда тирик бўлган одамларнинг исмлари ва манзилларидан ташқари, Жон Кеннедининг ўлдирилиши билан боғлиқ БАРЧА ҳужжатларни ошкор қилдираман", деб ёзган Трамп твиттерда.  

Унинг таъкидлашича, у буни "кўпроқ очиқ-ойдинлик бўлиши" ҳамда турли фитналарга чек қўйиш мақсадида амалга оширмоқда.  

26 октябрда Кеннедининг 1963 йилда ўлдирилиши билан боғлиқ 3 мингга яқин ҳужжат ошкор қилинган. 2891 ҳужжатдан иборат маълумотлар базаси миллий архивлар сайтида жойлаштирилган.

Кеннеди 1963 йил 22 ноябрда Далласда отиб ўлдирилган. Терговнинг расмий версиясига кўра, қотилликни собиқ денгиз аскари Ли Харви Освальд содир этган. Освальднинг ўзи икки кун ўтиб полиция бўлимида Жек Руби исмли шахс томондан отиб ташланган.