Мугабе ҳарбийлардан «ҳокимиятда яна жичча қолишни» сўради

Фото: Tsvangirayi Mukwazhi / AP

Зимбабвенинг ағдарилган президенти Роберт Мугабе ҳарбийлардан «яна бир неча кунгина ҳокимиятда қолишни» сўради, деб ёзади Independent нашри ўз манбаларига таяниб.

Ҳарбийлар гуруҳи бошлиғи, яқиндагина истеъфога чиқарилган вице-президент Эммерсон Мнангагванинг маслакдоши Крис Муцванва президент лавозимдан воз кечиши ҳақида ўзи қарорга келиши кераклиги, акс ҳолда, бу масалани улар ўз қўлларига олишларини таъкидлаб ўтди.

Нашрнинг ёзишича, «гарчи ҳукмрон Zanu-PF партияси бунинг аксини таъкидлаётган бўлса-да, 93 ёшли сиёсатчи ҳамон ҳокимият тепасида қолаётганини айтиб келмоқда».

«Агар у қайсарлик қиладиган бўлса, биз 19 ноябрь, якшанба куни уни ишдан бўшатишни ташкиллаштирамиз. Бу нарса амалга ошгач, унга нисбатан импичмент эълон қилинганини 21 ноябрь, сешанба куни эълон қиламиз», — деган партия вакили.

Илгарироқ, Зимбабве президенти ҳокимият ҳарбийлар қўлгига ўтганидан буён илк бор омма олдида кўриниш бергани хабар қилинган эди.

Тайёрлаган Шуҳрат Шокиржонов

#Зимбабве #Роберт Мугабе

14 ноябрь куни Зимбабведа ҳарбийлар мамлакат пойтахтига кирди. 15 ноябрь куни мамлакатга 37 йилдан буён раҳбарлик қилиб келган Роберт Мугабе ва оиласи қўлга олинди.