Мўсулни озод қилиш вақтида ҳалок бўлган тинч аҳолининг ҳақиқий сони маълум қилинди

Ироқнинг Мўсул шаҳрини ИШИД жангариларидан озод қилиш учун кечган 9 ойлик операция давомида 9 мингдан 11 минггача тинч аҳоли вакиллари ҳалок бўлган. Бу ҳақда АР ахборот агентлиги хабар бермоқда. 

АР журналистлари томонидан ўтказилган махсус терговда операция вақтида ҳалок бўлган фуқаролар сони аввал тахмин қилинганидан 10 баробар кўпроқни ташкил қилиши айтилган.

Бу янги рақамларни на АҚШ бошчилигидаги халқаро коалиция, на Ироқ ҳукумати тан олмоқда.

Ахборот агентлиги маълумотларига кўра, Ироқ ҳарбийлари ва халқаро коалиция 2016 йил октябридан 2017 йил июлигача бўлган давр ичида 3,2 минг фуқаронинг ўлимида айбдордир. Халқаро коалиция эса фақатгина 326 фуқаронинг ўлими учун жавобгарликни ўз зиммасига олган.   

Бундан ташқари, яна 3 мингдан кўпроқ киши жангарилар ҳаракатлари оқибатида ҳалок бўлган.

“Бу одамлар айнан қандай ўлганларини ва ИШИД бунда катта роль ўйнаганини тушуниш бунга ўхшаш ҳодиса юз берадиган кейинги марта кўплаб ҳаётларни сақлаб қолишга ёрдам беради. Терговни ўтказишга қолганларнинг қизиқмаслиги жуда ачинарлидир”, деб айтган Airwars ноҳукумат ташкилоти раҳбари Крис Вудс.

Тергов давомида БМТ, Amnesty International ҳуқуқ ҳимоячилари ва бошқа бир қатор шундай ташкилотлар ҳужжатлари таҳлил қилинган. 

Аввалроқ БМТда Мўсулни озод қилиш операцияси давомида камида 2521 фуқаро ҳалок бўлгани маълум қилинганди.

Мўсул 2014 йил ёзидан жангариларнинг бош истеҳкоми бўлган. 2016 йил октябрда Ироқ ҳарбийлари уни озод қилиш мақсадида ҳужум бошлашган. 2017 йил июлда эса Ироқ бош вазири террорчилар Мўсулда мағлуб этилганини расман эълон қилганди.