Европа марказий банки раҳбари Кристин Лагард ўз лавозимини муддатидан олдин тарк этмоқда. Банк матбуот хизматининг хабар беришича, Лагард 2027 йил 7 феврал куни истеъфога чиқади. Лагард бу ҳақда ЕМБ Бошқарув кенгаши ва Европа кенгаши раиси Антониу Коштага маълум қилган.
Reuters агентлигининг эслатишича, Кристин Лагарднинг ваколат муддати 2027 йил октябр ойида тугаши керак эди.
Лагарднинг кетиши Франция президенти Эммануэл Макрон ва Германия канцлери Фридрих Мерцга 2027 йил апрелда Францияда бўлиб ўтадиган сайловларга қадар янги раҳбар тайинлаш масаласини ҳал қилиш имконини беради, деб ёзади dpa агентлиги. Унинг муддатидан олдин кетиши мумкинлиги ҳақида анчадан бери маълум эди. Марин Ле Пен бошчилигидаги ўнг популистлар Франциядаги сайловларда ғалаба қозониши, бу эса ЕМБнинг янги раҳбариятини тайинлашни қийинлаштириши мумкин, дея аниқлик киритади агентлик.
Аввалроқ DW Лагарднинг муддатидан олдин истеъфога чиқишидан кўзланган мақсад ЕМБ раҳбари лавозимига Европа тарафдори бўлган мўътадил қарашларга эга номзод сайланишини таъминлаш бўлиши мумкинлигини қайд этганди.
Шу билан бирга, ҳатто ихтиёрий равишда муддатидан олдин лавозимни тарк этиш ҳам ЕМБ мустақиллиги борасида хавотирлар уйғотиши мумкин, деб таъкидлаган экспертлар. Банк сиёсий аралашувларсиз фаолият юритиши керак, унинг ваколатлари эса Европа Иттифоқини ташкил этиш тўғрисидаги шартномалар билан ҳимояланган нархлар барқарорлигини таъминлашга қаратилган. Таҳлилчилар яқин истиқболда банкнинг пул-кредит сиёсати ўзгаришсиз қолишини кутмоқда.
Reuters агентлигининг ёзишича, Лагард Жаҳон иқтисодий форумига ишга ўтиши мумкин. Европа кенгаши раиси Кошта Лагарднинг ўрнига номзодни аниқлаш жараёни 29 октябр куниёқ бошланишини маълум қилди.
