Деярли 1 трлн доллар! Миср президенти «араб баҳори» оқибатларига тўхталди

Яқин Шарқ минтақаси мамлакатларининг “араб баҳори” натижасидаги йўқотишлари 900 млрд долларни ташкил этади. Бу ҳақда Миср президенти Абдул Фаттоҳ ас-Сисий Қоҳирадаги форумда маълум қилди.

"Араб халқларига 2011 йилдаги “араб баҳори” ва ундан кейинги инқилоблар туфайли етказилган зарар 900 млрд долларни ташкил этади", - дея таъкидлаб ўтган Миср раҳбари. Ас-Сисийнинг сўзларига кўра, урушлар, ички можаролар ва инқилоблар сабабли минтақада бу даврда 1,4 млн киши ҳалок бўлди, яна 15 млн инсон қочқинга айланди.

Шу билан бирга, ас-Сисийнинг қайд этишича, Мисрда 2013 йилнинг июлидан бери вазият барқарорлашмоқда. Ўшанда амалдаги президент, “Мусулмон биродарлар” ҳаракати томонидан қўллаб-қувватланган Муҳаммад Мурсий ҳарбийлар томонидан ҳокимиятдан четлатилганди. Ўтган 4 йил давомида, Миср етакчиси маълумотларига кўра, ишлаб чиқаришнинг турли соҳаларида 11 мингта корхона қурилди, инфляция 35 фоиздан 22 фоизга қисқарди, мамлакат иқтисодиётига тўғридан-тўғри хорижий сармоялар ҳажми эса 2014 йилдан ўрталаридан бери 100 млрд Миср фунтини (тахминан 5,7 млрд доллар) ташкил этди. Ас-Сисийнинг таъкидлашича, 2016 йилнинг сентябридан Европага Миср ҳудудидан ноқонуний миграция бутунлай тўхтатилди.