«Трибуна» яна Европа чемпионатларидаги навбатдаги турларнинг энг муҳим ўйинлари билан таништиради.
ЛЕСТЕР СИТИ – СУОНСИ СИТИ (3 февраль, 20:00)
«Шаҳарликлар» дербиси. Балки икки ҳафта олдин бу ўйиннинг якуни олдиндан маълум ёки у қадар қизиқ эмасдек туюлиши мумкин эди. Аммо айни пайтда «Суонси»ни эътиборсиз қолдириш мумкин эмас.
Уэльсликлар сўнгги икки турда «Ливерпуль» ва «Арсенал» устидан ғалабага эришишди. Ҳали ҳам хавфли зонада бўлган жамоа ҳар бир ўйинда очко олишга уриниши табиий. «Лестер» ҳам аутсайдерлардан у қадар узоқлашиб кетмаганини эътиборга олсак, айниқса, жамоанинг мана шундай ўйинларда очко йўқотишга ҳаққи йўқ.
Шунингдек, бу ўйинда меҳмонлар таркибида Андре Айю ҳам дебют қилиниши мумкин. «Вест Ҳэм»дан сотиб олинган ва жароҳати тиклангани айтилаётган футболчи укаси Жордан билан биргаликда жуда хавфли тандем бўлишини кутиш мумкин. «Лестер» таркибида эса, Риёз Маҳрезнинг ҳолати сўроқ остида – у амалга ошмай қолган трансфери туфайли аразлаб машғулотларга келмаган ва «Эвертон» билан ўйинда майдонга тушмаганди. Бундан ташқари, мезбонлар сардори Уэс Морган ҳали ўйнашга тайёр эмас.
Жамоаларнинг октябрь ойида бўлиб ўтган ўйинида «Лестер» сафарда 2:1 ҳисобида устун келганди.
АРСЕНАЛ – ЭВЕРТОН (3 февраль, 22:30)
Ниҳоят янгиланган «Арсенал»ни томоша қилмоқчи бўлганлар бу ўйинни ўтказиб юбормасин. Янги келиб қўшилган Генрих Мхитарян ва Пьер-Эмерик Обемеянг бу ўйинда тўлиқ ҳолда ўз салоҳиятларини намойиш қилишлари мумкин. Албатта, Ўзилнинг клуб билан шартномани узайтириши лондонликлар учун яна бир ажойиб хабар бўлди ва энди «Арсенал» келажаги ҳақида оптимистик қарашлар кўпайиши табиий.
Аммо мавсум давом этмоқда ва АПЛдаги муаммоларни ечиш янада оғирроқ. «Арсенал» 4-ўриндаги жамоадан 8 очко ортда қолмоқда ва асосий рақибларнинг ўйини кучайиб бораётганини эътиборга олсак, очко йўқотиш сира мумкин эмас. «Арсенал» «Эвертон»га қарши сафарда ушбу мавсумдаги энг чиройли ўйинларидан бирини намойиш қилган ва 5:2 ҳисобида устун келганди.
«Эвертон» таркибига қўшилиб, ўтган турда «Лестер» дарвозасига дубл қайд этган Тео Уолкотнинг «Арсенал»га қарши ҳаракат қилишини кузатиш ҳам жуда қизиқ бўлса керак.
БОРУССИЯ М – РБ ЛЕЙПЦИГ (3 февраль, 22:30)
Бундеслигада чемпион қайси жамоа бўлиши ҳақидаги савол ўртадан кўтарилган бўлса керак. «Бавария» энг яқин таъқибчисидан 16 очкога илгарилаб кетган.
Мавзуга оид
Аммо Чемпионлар Лигаси йўлланмасини берадиган қолган уч ўрин учун 6 жамоа даъвогарлик қилмоқда. 2-ўриндаги «Байер» ва 7-ўриндаги Менхенгладбах жамоасини атиги 3 очко ажратиб турибди холос.
Ўтган мавсум кашфиёти «РБ Лейпциг» ҳам мана шу гуруҳ жамоалари ичида. Демак бу ўйинда ғалаба қозонган жамоа кучли тўртликка кириб олиши мумкин.
Бу жамоалар ўртасида ўтган аввалги 3 ўйин ҳам кескин курашларга бой ўтганини таъкидлаш керак ва бу ўйинларда ҳали «Боруссия» бирорта ҳам ғалаба қозона олмаган.
Бу ўйинда ҳар икки жамоада биттадан ёш юлдуз дебют қилиши мумкин. «Вест Ҳэм»дан ижарага олинган Рис Оксфорд мезбонлар сафига келиб қўшилган бўлса, «Лейпциг» «Эвертон»дан Адемола Лукманни ижарага олди. Шунингдек, меҳмонларнинг етакчи футболчиси Эмил Форсберг ҳам ушбу ўйинда майдонга қайтиши мумкин.
ЭСПАНЬОЛ – БАРСЕЛОНА (4 февраль, 20:15)
Каталония дербисини Мадрид ёки Милан дербисига қиёслаш ноўрин, жамоалар ўртасидаги сўнгги 23 ўйиндан 16тасини «Барселона» ютгани ҳам жуфтликдаги номутаносибликни ифодалайди.
Аммо ҳар қандай ҳолатда ҳам «Эспаньол» бу ўйинга алоҳида тайёргарлик кўришини ва ҳеч бўлмаса, ўйин олдидан интрига мавжудлигини тан олиш керак. Юқоридаги статистикага бошқа томондан қарасак, «Эспаньол»ўз майдонидаги «Барселона»га қарши ҳар икки ўйиннинг бирида жидддий қаршилик кўрсатган ва ҳар уч ўйиндан бирида очко олишга муваффақ бўлган.
Узоққа бориш шартмас, мана шу январь ойида, Испания кубогида чорак финалида бу жамоалар тўқнаш келди ва «Эспаньол» ўз майдонидаги ўйинни ўз фойдасига ҳал қилди.
Шунингдек, мезбонлар хавфли зонадан у қадар узоқлашиб кетмаганликларини ва иккинчи даврада ҳар бир очко сув ва ҳаводек зарур эканини эътиборга олиш лозим.
Ўйин якшанба кунига, жуда эрта қўйилгани ҳам меҳмонларнинг зарарига ишлайди. «Барселона» кеча оқшомда «Валенсия»га қарши кубок ярим финалида майдонга тушди ва навбатдаги тургача тўлиқ икки кун танаффус қилиш имкони бўлмагани Валверде учун яна бир бошоғриқ бўлиши турган гап.
Тўғри, ўйин фаворити «Барселона», бу жамоада ғалаба қозониш имконияти катта. Шунчаки, қизиқтириш учун «Эспаньол»нинг устунликларини санадик холос.
ЛИВЕРПУЛЬ - ТОТТЕНҲЭМ (4 февраль, 21:30)
Ушбу мавсумда Англиядаги Топ-6 яна бир, аввалги мавсумларда кўзга ташланмаган жиҳатни ҳам кўрсатмоқда. АПЛнинг топ клублари ўз майдонида жуда ишончли тўп суришмоқда. «Челси»ни эътиборга олмасак, «МЮ», «Тоттенҳэм» ва «Арсенал» клублари фақат бир мартадан ўз майдонларида мағлубиятга учрашган. «Ливерпуль» ва «Сити»да бундай мағлубиятлар умуман йўқ. Агар «Сити»нинг барчадан устунлигини тан олсак, қолган топ клублар ўртасидаги 13 ўзаро ўйиннинг атиги 2тасида меҳмонларнинг қўли баланд келган холос. Яъни ушбу мавсумдаги топ ўйинларнинг кўпида мезбонлар устунлик қилишмоқда ва керакли натижани қайд этишмоқда.
Бу рақиблар мана шу статистиканинг энг ёрқин намоёндалари – «Ливерпуль» ўз майдонида бирор марта мағлуб бўлмади, «Тоттенҳэм» эса, сафарда «Сити», «Арсенал», «Манчестер Юнайтед»га қарши ўйнаб, барчасида мағлубиятга учради.
Шу туфайли, «Ливерпуль»нинг бу ўйинда устунлик қилишини тахмин қилиш мумкин, аммо «Тоттенҳэм» ҳам, айниқса, етакчи футболчилар майдонга қайтиб, «Манчестер Юнайтед»ни не кўйга солганини эътиборга олсак, ўйин жуда қизиқарли бўлишини кутиш мумкин.
Ўйиннинг турнир нуқтаи назаридан ҳам аҳамияти юқори. «Ливерпуль» 50 очко билан учинчи, «Тоттенҳэм» эса атиги 2 очко кам тўплаб, 5-ўринда бормоқда. Мезбонларнинг ғалаба қозониб, энг яқин таъқибчини сезиларли фарқ билан ортда қолдириш имконияти бор, «Тоттенҳэм» эса, агар ютса, узоқ танаффусдан сўнг яна тўртликка қайтади. Лондонликлар сўнгги икки мавсумда айнан иккинчи даврада яхши очко тўплаб, юқори ўринларни эгаллаган.
Жамоаларнинг «Уэмбли»даги ўйини эсингизда бўлса, Почеттино жамоаси рақибга умуман имконият қолдирмаган ва йирик ҳисобда мағлуб этганди.
«Реал» қаторасига икки ғалаба билан бу жамоаларга яқинлашиб келмоқда. «Барселона»нинг етиб бўлмас даражада илгарилаб бораётганини эътиборга олсак, 2-ўрин ҳам бу жамоалар учун жуда яхши натижа сифатида баҳоланиши табиий.
Сўнгги йилларда «Атлетико» валенсияликларнинг аср бошидаги учинчи испан жамоаси мақомини тортиб олган бўлса-да, «кўршапалаклар» Мадридда ёмон ўйин кўрсатишмайди. «Атлетико»га қарши сўнгги 8 сафар ўйинининг ярмида «Валенсия» ютқазмасликни уддалаган.
«Валенсия»га юқорида ҳам тилга олинган сабаб халақит беради – жамоа уч кун ичида ҳам Барселонага, ҳам Мадридга сафар қилиши ва муҳим учрашувларда майдонга тушиши жуда қийин бўлиши тайин. Ўз навбатида, «Атлетико»да ҳам муаммолар бор: Коста, Гайтан, Филипе Луис ва Гемейронинг машғулотларга қайтгани айтилаётган бўлса-да, уларнинг ўйин бошидан жамоага ёрдам бера олишлари сўроқ остида.
Биринчи даврадаги ўйин «Валенсия»нинг яққол устунлигида ўтган, лекин ҳисоб очилмаганди.
Бу ўйинни ҳам турнир эътибори билан Испаниядаги юқорида тилга олинган учрашувга қиёслаш мумкин. «Лион» 48 очко билан иккинчи ўринда, «Монако» эса тўртинчи ўринни эгаллаб турибди. Жамоа ҳисобида 47 очко бор. Фарқи, Францияда кучли тўртликни таъқиб қилаётган «Нант» анча ортда қолиб кетган.
Бошқа томондан бу омил жамоаларнинг янада ҳужумкор, мухлисларбоп ўйин кўрсатишларига ҳам сабаб бўлиши мумкин. Зеро биринчи даврада Лионда бўлиб ўтган ўйин барчанинг эсида бўлса керак. Фақатгина Фекирнинг 90+5 дақиқада урган голи мезбонларга 3:2 ҳисобидаги ғалабани тақдим этганди.
