Мисрда 10 нафар террорчи энг олий жазога ҳукм қилинди

Фото: ТАСС

Мисрда террорчилик фаолиятида айбдор деб топилган 10 кишига нисбатан аввал олий жазо ҳақида чиқарилган ҳукм тасдиқланди. Бу ҳақда ТАСС агентлиги Гиза Жиноий суди вакилига асосан хабар бермоқда.

Имбобо туманида террорчилик ячейкасини ташкил этиш бўйича ишга жалб этилган яна беш киши умрбод озодликдан маҳрум этиш жазосига маҳкум қилинди.

Айблов хулосасига кўра, судланувчилар «ноқонуний ташкилотни ташкил этишган, у биноларга ҳужум қилиш, мамлакат бирлигига таҳдид уйғотиш, христианлар ва мамлакат қуролли кучлари вакилларига қарши йўналтирилган терактларни содир этишга тайёргарлик кўришни мақсад қилган».

Эслатиб ўтамиз, Мисрда февраль ойида террорчилик гуруҳининг 21 иштирокчиси ўлим жазосига маҳкум этилганди.