Айрим фаолият турларини лицензиялаш Вазирлар Маҳкамасидан давлат органларига ўтказилди

Ўзбекистон Республикаси Президенти Шавкат Мирзиёев «Тадбиркорлик фаолияти соҳасидаги лицензиялаш ва рухсат бериш тартиб-таомилларини янада қисқартириш ва соддалаштириш, шунингдек бизнес юритиш шароитларини яхшилаш чора-тадбирлари тўғрисида»ги фармонни имзолади.

Фармоннинг 4-иловасида 2018 йил 1 июнидан лицензиялаштирилиши Ўзбекистон Республикаси Вазирлар Маҳкамасидан тегишли давлат органларига ўтказиладиган фаолиятининг айрим лицензиялаштириладиган турлари келтирилган.

Жумладан:

• нефть, газ ва газ конденсатини қазиб олишни лицензиялаштириш — «Ўздавнефтгазназорат» Давлат инспекциясига;
• пиротехника маҳсулотларини (ҳарбий мақсадлардаги маҳсулотлардан ташқари) яратиш, ишлаб чиқариш, бир жойдан иккинчи жойга кўчириш, сақлаш, реализация қилиш, фойдаланиш, йўқ қилиш ва утиллаштириш — Ички ишлар вазирлигига;
• нефть маҳсулотлари (автобензин, авиабензин, экстрабензин, дизель ёқилғиси, авиакеросин, мазут, печь ёқилғиси, нефтебитум, шунингдек, техник ёғлар ва мойлаш материаллари) завод қадоғига солинганларидан истисно этилганда (нефть автомобилларга ёқилғи қуйиш шохобчалари ва мой алмаштириш пунктларида реализация қилинадиган нефть маҳсулотлардан ташқари) ни реализация қилиш — «Ўздавнефтгазназорат» Давлат инспекциясига;
• магистрал газ ўтказиш қувурлари, нефть ўтказиш қувурлари ва нефть маҳсулотлари ўтказиш қувурларини лойиҳалаштириш, қуриш, эксплуатация қилиш ва таъмирлаш — «Ўздавнефтгазназорат» Давлат инспекциясига;
• геодезик ва картографик фаолият — Ер ресурслари, геодезия, картография ва давлат кадастри бўйича давлат қўмитасига;
• ноширлик фаолияти — Ўзбекистон матбуот ва ахборот агентлигига;
• портловчи ва заҳарли моддалар ва улар иштирок этган материаллар, шунингдек, портлатиш воситаларини яратиш, ишлаб чиқариш, бир жойдан иккинчи жойга кўчириш, сақлаш, реализация қилиш — «Саноатгеоконтехназорат» давлат инспекциясига;
• ионлаштирувчи нурланиш манбаларини айлантириш соҳасидаги фаолият — «Саноатгеоконтехназорат» давлат инспекциясига;
• қимматбаҳо ва нодир металлар, қимматбаҳо тошларни қазиб олиш — «Саноатгеоконтехназорат» давлат инспекциясига берилади.