Арманистонда 13 апрель кунидан буён норозилик намойишлари бўлиб ўтмоқда. 16 апрель, душанба куни тонгида Ереван шаҳрида намойишларнинг йирик тўлқини кузатилди. Намойишчилар мамлакатни 10 йил бошқаргач, ваколат муддати тугаши яқинлашгач, 2017 йили референдум орқали конституцияга ўзгартириш киритиб, президентлик республикасини парламентар республикага айлантирган ҳамда энди ўзи бош вазирга айланаётган Серж Саргсянга қарши норозилик чиқишлар ўтказишмоқда.
Намойишларга депутат Никол Пашинян бошчилик қилмоқда.
Душанба куни қўлларида Ереванда Арманистон байроқлари бўлган намойиш иштирокчилари Миллий Мажлисга элтувчи Маршал Баграмян кўчасини эгаллаб олишди ва бир вақтнинг ўзида шаҳар марказида ҳаракатни тўхтатиб қўйишди.
Мухолифат тарафдорларидан иборат намойишчилар парламент биноси ичига киришга уринишди, полиция бу уринишларни йўққа чиқарди.
Намойишчилар шу куни пойтахт марказидаги бир қанча кўчаларни ва чорраҳаларни эгаллаб, транспорт қатновини чеклашди. Улар «Еритасардакан» метро бекатини тўсиб қўйишга ҳаракат қилишганди, аммо полиция уларни бу ердан улоқтирди. Лекин намойишчилар Арманистон Конституцион суди биносига киришга муваффақ бўлишган.
