25 август куни эрталаб 71 ёшли Кочарян қўлга олиниб, Коррупцияга қарши курашиш қўмитасига келтирилди ва унга айблов эълон қилинган, деди унинг адвокати Арам Орбелян. Бу ҳақда BBC хабар берди.
Коррупцияга қарши курашиш қўмитаси бу маълумотни тасдиқлади ва Кочарян ҳамда унинг ўғли, «Арманистон» мухолифат блоки депутати Левоннинг уйларида тинтув ўтказилаётганини қўшимча қилди.
«Арманистон Коррупцияга қарши курашиш қўмитаси томонидан коррупциявий жиноятлар фактлари юзасидан тергов қилинаётган жиноий иш доирасида бир неча ўнлаб манзилларда тинтув ва бошқа процессуал ҳаракатлар олиб борилмоқда», — деди қўмита матбуот котиби Марина Оганжанян.
Кўп ўтмай, Арманистон Бош прокуратураси Кочарянга нисбатан мансаб ваколатларини суиистеъмол қилиш, пора олиш ва ўта йирик миқдорда пул ювиш моддалари бўйича жиноий иш қўзғатилганини эълон қилди.
Прокурор яна тўққиз кишига, жумладан, собиқ президентнинг ўғли Седрак Кочарянга нисбатан ҳам оммавий жиноий таъқибни бошлади.
Биринчи ҳибсга олиниши эмас
Коррупцияга қарши курашиш қўмитаси версиясига кўра, Кочарян 1998–2008 йилларда президентлик даврида бошқа шахслар билан тил бириктириб, давлат мулкини кимошди савдосисиз ва бозор нархидан анча арзон нархларда ўзига, шунингдек, ўзига алоқадор шахслар ва компанияларга ўтказиб берган.
Собиқ президент идораси унинг ҳибсга олинишини шарҳлар экан, «ҳокимиятнинг президент Кочарян ва унинг оиласига қарши навбатдаги ҳужуми бошланди», деб баёнот берди.
Кочаряннинг қўлга олиниши парламентда унинг ўғли Левон ва бош вазир Никол Пашинян ўртасидаги оғзаки тортишувдан бир кун ўтиб содир бўлди. Пашинян Кочарянлар оиласини халқ ҳисобидан бойиганликда айблаб, «ўмарилган миллионлар»нинг мерос бўлиб қолишига йўл қўймасликка ваъда берди. Бунга жавобан собиқ президентнинг ўғли бош вазирни адолатни «танлаб қўллашда» айблади.
Кочарян 1998 йилдан 2008 йилгача Арманистон президенти бўлган. 2018 йил июль ойида у 2008 йилда конституциявий тузумни ағдаришда айбланиб ҳибсга олинган эди. Хусусан, унга президентлик сайлови натижаларига қарши норозилик намойишларини тарқатиб юбориш айби қўйилган, бунинг оқибатида камида ўн киши ҳалок бўлганди.
