Ўзбекистон Республикасининг ташқи савдо вазири Жамшид Ходжаев бошчилигидаги расмий делегацияси Покистон Ислом Республикаси (ПИР)га ташрифини якунлади. Делегация Федерал қишлоқ хўжалиги ва озиқ-овқат хавфсизлиги вазирлиги, Молия ва иқтисодий муносабатлар вазирлиги, Покистон ташқи ишлар вазирлиги, шунингдек Коммерция ва тўқимачилик саноати вазирлигида қатор музокаралар ўтказди. Музокаралар якунига кўра, турли соҳларда келишувларга эришилди. Ташқи савдо вазирлиги матбуот хизмати KUN.UZ'га шу ҳақида хабар берди.
Федерал қишлоқ хўжалик ва озиқ-овқат хавфсизлиги вазирлиги раҳбарияти билан музокаралар чоғида вазир С.Босан Тошкентга ташрифи давомида Ўзбекистоннинг қишлоқ хўжалик техникасининг юқори сифатига шахсан ишонч ҳосил қилганини таъкидлади.
"Ўзбекистонлик ишлаб чиқарувчилар техникаси Европа муқобилларидан ҳеч ҳам кам эмас, боз устига уларнинг баҳоси бизни кўпроқ жалб қилади. Бугунга келиб Покистоннинг тракторларга бўлган эҳтиёжининг ўзиёқ йилига 20 минг донани ташкил қилишини инобатга оладиган бўлсак, биз Ўзбекистон техникаси етказиб берилишидан ва Покистон ҳудудида йиғиш механизмини ташкиллаштиришдан манфаатдормиз", - деди ПИР федерал қишлоқ хўжалик ва озиқ-овқат хавфсизлиги вазири.
Ўзбекистон делегацияси ташаббуси билан томонлар таҳлил ва божхона тўловларини қайта кўриб чиқиш учун қўшма ишчи гуруҳини тузишга келишиб олишди. Бундан ташқари, Покистон томон тез орада Панжоб вилояти ҳудудида қишлоқ хўжалик механизациясини ташкиллаштириш учун бор кучини сафарбар этишга тайёр эканини билдирди. Шунингдек манфаатдор мамлакатлар билан ҳамкорликда транспорт йўлакчаларини ташкил қилишга тайёрлик билдирилди.
Музокаралар якунлари бўйича томонлар сертификация ва стандартизация соҳасида ҳамкорликни йўлга қўйиш борасидаги, шу жумладан икки мамлакат сертификатларининг ўзаро тан олинишини таъминлашга доир келишувларга эришишди.
