Божхона чегараси орқали чармни олиб чиқишга рухсатнома бериш тартибида ўзгаришлар юз беради 

Ўзбекистон Республикаси Вазирлар Маҳкамасининг “Ўзбекистон Республикасининг божхона чегараси орқали чармни олиб чиқишга рухсатнома бериш тартиби тўғрисидаги низомни тасдиқлаш ҳақида”ги қарори муҳокама учун эълон қилинди.

Низомга кўра, чармни Ўзбекистон Республикаси ташқарисига олиб чиқишга рухсатнома бир йилга берилади ва рухсатнома бериш Идоралараро комиссия томонидан амалга оширилади.

Уюшма аъзолари – ташкилотлар келгуси йил учун чармни Ўзбекистон Республикаси ташқарисига олиб чиқишга рухсатнома олиш учун жорий йилнинг 1 декабрига қадар олиб чиқиладиган маҳсулотнинг физик ҳажмини кўрсатган ҳолда Уюшмага буюртма тақдим этадилар.

Уюшма аъзолари – ташкилотлар томонидан тақдим этилган буюртмалар Уюшма томонидан 10 иш куни муддатида жаҳон бозорларининг жорий ва истиқболли конъюнктураси ва маркетинг тадқиқотлари натижаларига асосан кўриб чиқилади.

Жаҳон бозорларидаги нархлар тўғрисидаги маълумотлар асосида кўриб чиқиш натижаларидан келиб чиқиб Уюшма томонидан барча буюртмалар бўйича жамланма маълумот тайёрланади ва 15 декабрдан кечикмасдан Ташқи савдо вазирлигига тақдим этилади.

Ташқи савдо вазирлиги Уюшма томонидан тақдим этилган жамланма маълумотни ўз ваколатлари доирасида кўриб чиқади ва 20 декабрдан кечикмасдан чармни Ўзбекистон Республикаси ташқарисига олиб чиқишга рухсатнома бериш учун Идоралараро комиссияга тақдим этади.

Идоралараро комиссия тақдим этилган маълумотларни 25 декабрдан кечикмасдан кўриб чиқади ва чармни Ўзбекистон Республикаси ташқарисига олиб чиқишнинг минимал нархларини белгилаган ҳолда, келгуси йил учун бир йил муддатга чармни Ўзбекистон Республикаси ташқарисига олиб чиқишга рухсатнома беради.

Идоралараро комиссиянинг рухсатномаси Идоралараро комиссия баённомаси билан расмийлаштирилади.

Уюшма аъзолари – ташкилотлар томонидан чармни Ўзбекистон Республикаси ташқарисига олиб чиқиш бўйича йил давомида қўшимча рухсатномага эҳтиёж туғилганида рухсатнома бериш юқоридаги тартибга мувофиқ амалга оширилади.

Бунда рухсатнома бериш бўйича амалга ошириладиган тадбирларнинг ҳар бир босқичида ҳужжатларни кўриб чиқиш муддати беш иш кунидан ошмаслиги лозим.

Чармни Ўзбекистон Республикаси ташқарисига олиб чиқиш бўйича экспорт контрактларини Идоралараро комиссиянинг рухсатномасига мувофиқлиги мониторинги ва назорати Уюшма томонидан амалга оширилади.

Уюшма аъзолари – ташкилотлар экспорт контрактлари мониторингини амалга ошириш учун экспорт контрактлари ва нарх калькуляциясини Уюшмага тақдим этадилар.

Ўзбекистон Республикасининг божхона чегараси орқали ярим тайёр чарм “вет блю” (ТИФ ТН бўйича 4104, 4105, 41062 кодлари) маҳсулотини олиб чиқиш учун экспорт контрактлари экспорт қилинадиган маҳсулот қийматининг 5 фоизи миқдорида Чарм-пойабзал соҳасини ривожлантириш ва қўллаб-қувватлаш жамғармасига тўланган йиғим бўйича тўлов ҳужжати нусхаси билан бирга Уюшмага тақдим қилинади.

Уюшма аъзолари – ташкилотлар томонидан тақдим қилинган экспорт контрактлари ва нарх калькуляцияси Уюшма томонидан икки иш куни муддатида Идоралараро комиссиянинг рухсатномасига мувофиқлиги бўйича нарх мониторингидан ўтказилади.

Уюшма аъзолари – ташкилотлар томонидан тақдим қилинган экспорт контрактларидаги нархлар Идоралараро комиссиянинг рухсатномасига мувофиқ бўлганида Уюшма ушбу контрактлар бўйича Давлат божхона қўмитасига маълумотнома хат беради.

Уюшма аъзоси – ташкилот томонидан Уюшмага мониторинг учун тақдим қилинган ҳужжатлар нусхалари Уюшмада сақлаш учун қолдирилади.

Давлат божхона қўмитасига Уюшма томонидан тақдим қилинган маълумотнома хат асосида давлат божхона постларида чармни олиб чиқиш (экспорт) жараёнлари назорат қилинади.

Давлат божхона қўмитаси ҳар чорак якуни бўйича Ўзбекистон Республикасининг божхона чегараси орқали чармни олиб чиқилиши (экспорти) тўғрисида Уюшма сўровига кўра маълумот беради.

Давлат божхона қўмитасидан олинган маълумотлар асосида Уюшма доимий равишда Ўзбекистон Республикасининг божхона чегараси орқали чармни олиб чиқилиши (экспорти) ҳисобини юритади.

Давлат божхона органларида олиб чиқиб кетилаётган чарм бўйича асосли шубҳа пайдо бўлганида божхона органлари лаборатория текшируви хулосасини талаб қилиш ҳуқуқига эга.

Чармни Ўзбекистон Республикаси ташқарисига олиб чиқиш учун лаборатория текширувини ўтказиш Ўзбекистон Республикаси Президенти ҳузуридаги Лойиҳа бошқаруви миллий агентлиги қошидаги Аккредитация маркази томонидан аккредитация қилинган органлар томонидан амалга оширилади.