Шавкат Мирзиёев Куба раҳбарига ҳамдардлик билдирди

Ўзбекистон Республикаси президенти Шавкат Мирзиёев Куба Республикасининг Давлат Кенгаши ва Вазирлар Кенгаши раиси Мигел Марио Диас-Канел Бермудесга Кубада йўловчи самолётининг ҳалокати оқибатида кўплаб инсонлар қурбон бўлганлиги муносабати билан мактуб йўллади. Бу ҳақда ТИВ ахборот хизмати хабар бермоқда.

«Куба халқи учун ушбу қайғули кунда самимий таъзиямни қабул қилишни ва ҳалок бўлганларнинг оила аъзолари ҳамда яқинларига ҳамдардлик ва далда сўзларини, шунингдек, жароҳатланганларга тезда соғайишлари тилагини етказишни сўрайман», - дейилади давлат раҳбари мактубида.

Самолёт 18 май куни Гаванадаги аэропортдан кўтарилиши биланоқ ҳалокатга учраган. У Ольгинга учаётган бўлиб, бортида 104 йўловчи ва экипаж аъзолари бўлган.

Эслатиб ўтамиз, аввалроқ Кубада уч кунлик мотам эълон қилингани хабар берилганди.