Тожикистонда 9 миллионинчи фуқаро яқин кунларда туғилиши кутиляпти

Тожикистонда тўққиз миллионинчи фуқаро яқин кунлар ичида туғилиши кутилмоқда. 2018 йил 1 январь ҳолатига кўра, Тожикистон аҳолиси сони 8 млн 931 минг кишини ташкил этди, биринчи чорак якунлари бўйича эса бу кўрсаткич 8 млн 973 мингга етган.

Мамлакат аҳолисининг йиллик ўртача ўсиши 1998 йилдан бери 2 фоизни ташкил этаётгани ҳисобга олинса, тўққиз миллионинчи фуқаро май охирида туғилишини тахмин қилиш мумкин.

Апрелда, статистика агентлиги маълумотларига кўра, Тожикистонда 20 минг чақалоқ дунёга келган.

Мутахассисларнинг ҳисоб-китобларига кўра, тўққиз миллионинчи фуқаронинг туғилишига саноқли кунлар қолди.

Мамлакат Соғлиқни сақлаш вазирлиги ва ТР президенти ҳузуридаги Статистика агентлиги бу вазиятни кузатиб бормоқда.

Ҳозирча чақалоқнинг ота-онасига қандай совға берилиши номаълум.

Тожикистонда 7 миллионинчи фуқаро 2006 йилнинг 13 августида туғилган бўлса, саккиз миллионинчи фуқаро 2013 йилда таваллуд топган.