Хитойда осмондан қисқичбақалардан тортиб саккизоёқларгача “ёғилди”

Интернетда Хитойнинг Циндао шаҳри аҳолиси томонидан олинган антиқа суратлар пайдо бўлди. Бу ерда кузатилган “Эвиниар” тўфони соҳил бўйида жойлашган шаҳар кўчаларига қисқичбақалардан тортиб саккизоёқларгача бўлган турли денгиз жонзотларини “ёғдирди”. Бу ҳақда Daily Mail нашри маълум қилди. 

Суратлардан автомобилларнинг олд ойналари ва электр узатиш линияларида саккизоёқлар, қисқичбақалар ва денгиз юлдузларини кўриш мумкин. 

Ушбу ҳодиса Хитой ижтимоий тармоқларидаги асосий мавзулардан бирига айланди. Фойдаланувчилар тўфон “элтган” деликатеслар суратлари билан бўлиша бошлашган.

Баъзи омадлилар эса ўзгача таомни танлаш имконига эга бўлдилар, чунки тўфон уларга пуллар “келтирган”. 

Турли жонзотлардан иборат “ёмғирлар” дунёнинг кўплаб давлатларида кузатилган ноёб метеорологик ҳодисадир.