Машина сентябр охирида Сичуан провинциясининг маъмурий маркази — Чэнду шаҳрида ишлаб чиқариш линиясидан чиқарилган. Унинг умумий узунлиги 220 метр, қазиш диаметри эса 13,01 метрни ташкил этади.
Yuexi’ни Shudao Investment Group инфратузилма компанияси ва туннел қазиш техникалари ишлаб чиқарувчи China Railway Engineering Equipment Group биргаликда яратган. Рекорд барча туннел қазиш машиналарига эмас, айнан икки қалқонли комплекслар тоифасига тегишли.
Бундай машиналар айланувчи кесиш диски ёрдамида тоғ жинсларини майдалаб, туннел очади. Икки қалқонли конструкция турли геологик шароитларда, жумладан, мустаҳкам ва дарз кетган жинсларда ишлашга мослашган.
Yuexi’нинг олд қисмида ҳар бирининг диаметри қарийб 48 сантиметр бўлган 83 та дискли кескич ўрнатилган. Улар тоғ жинсларини майдалайди, гидравлик тизим эса машинани олдинга суради.
Комплекс бир вақтнинг ўзида бир нечта вазифани бажара олади: жинсларни қазийди, туннел деворларига йиғма темир-бетон қисмларни ўрнатади, атрофдаги жинсларни мустаҳкамлайди ва қазилган материални ташқарига чиқаради.
Машина бурғилаш ва геологик разведка тизимлари билан ҳам жиҳозланган. Улар олдиндаги жинслар ҳолатини комплекс ўша нуқтага етиб бормасидан аввал баҳолаш имконини беради. Автоматик лазерли йўналтириш тизими эса қазиш йўналишини юқори аниқликда сақлашга хизмат қилади.
Yuexi Сичуан провинциясидаги Цзинкоухэ — Сичан тезюрар автомобил йўлининг Юэси туннели қурилишида ишлатилади. У ойига 380 метрдан ортиқ масофани қазиб ўтиши мумкинлиги билдирилмоқда.
Ушбу усул фақат бурғилаш ва портлатишга асосланган анъанавий қурилишга нисбатан уч–беш баробар самарали бўлиши кутилмоқда.
Лойиҳа Хитойда йирик диаметрли икки қалқонли машинанинг автомобил туннели асосий қисмини қазишда илк бор қўлланиши бўлади. Илгари бундай комплекслар кўпроқ темирйўл ва метро туннеллари қурилишида ишлатилган.
