Ўзбекистон ва Беларусь тиббиёт маҳсулотлари ишлаб чиқариш бўйича қўшма корхона ташкил этмоқчи

Ўзбекистон ва Беларусь тиббиёт маҳсулотлари ишлаб чиқариш бўйича қўшма корхона ташкил этиш масалаларини муҳокама қилмоқда. Бу ҳақда Беларусь Соғлиқни сақлаш вазирлиги Иқтисодиёт ва маркетинг бошқармаси бошлиғи - Фармацевтика саноати департаменти директори ўринбосари Виктор Шеин маълум қилди, деб ёзмоқда БелТА.

Ўзбекистонда ҳозирги вақтда «Белфармпром» холдинги ва инфузион-трансфузион системалар, қон қуйиш учун асбоблар, зондлар, дренаж қурилмалари ва диализ учун бошқа тиббиёт маҳсулотлари ишлаб чиқарувчи Борисов тиббий препаратлар заводининг шўъба корхонаси - «Фребор» УК раҳбарияти қўшма корхона бўйича музокаралар олиб бормоқда.

«Ўзбекистонда қўшма ишлаб чиқаришни ташкил этиш шаклида қувватларнинг бир қисмини кўчиришни режалаштирмоқдамиз», - деди Виктор Шеин. 

Унинг таъкидлашича, Беларусь томони бошқа мамлакатлар, масалан, Грузия ва Тожикистон бозорларида ҳам шундай схемада ишлашни режалаштирган.