Қаторасига уч мавсумда Чемпионлар лигаси ғолиби бўлган «Реал» янги даврга ўтмоқда. Жамоани аввалига ушбу ғолибона юришга бошлаб борган бош мураббийи Зинедин Зидан, кейин эса 5 карра «Олтин тўп» соҳиби Криштиану Роналду тарк этди. Энди эса Лука Модрич ҳам Италияга йўл олмоқчи. Қуйида воқеалар ривожини кўриб чиқамиз.
Перес нима учун музокара ўтказишга рози бўлди?
Фото: REUTERS/Juan Medina
Уч ҳафта муқаддам Модрич Россиядаги жаҳон чемпионатининг энг яхши футболчиси сифатида тақдирланганди. Яна бир бор индивидуал мукофот «Реал» футболчисига тегди. Интернетда мадридликлар клуби президенти Флорентино Перес устидан кула бошлашди - у янги футболчиларни трансфер қила олмаяпти, ахир энг кучлиларнинг бари жамоада йиғилиб бўлганку?!
Аммо эндиликда «қаймоқранглилар»нинг президентига ҳавас қилиб бўлмайди. Модрич «Интер» билан оғзаки келишувга эришиб бўлган ва президентнинг жавобини кутмоқда. «Реал» президентининг илк реакцияси кутилганидек бўлди: кимки Модрич учун 750 миллион евро тўласа, уни ўзиники қилиши мумкин! Аммо бу тарих шу билан якунланмади. Охирги хабарларга кўра Перес миланликлар клуби билан музокара ўтказишга рози бўлган. Буни ундан Модричнинг ўзи сўраган.
ОАВ хабарига кўра Лука Криштиану Роналду каби ёки жамоа машғулотларини бойкот қила-қила ниятига эришган ва «Челси»га йўл олган ватандоши Матео Ковачич каби радикал кайфиятда эмас. У барчасини тинчгина ҳал қилмоқчи. Ҳа, у аввалига таътилини узайтирди ва жамоанинг мавсумолди йиғинида кўринмади. Аммо у клубдан ўтган йиллар учун қаттиқ миннатдор ва зиддият юзага келишидан қочмоқжа. Шу туфайли у Переснинг ўзи рози бўлишини кутмоқда.
Лука Модрич чоршанба куни Мадридга қайтиб келди. Gazzetta dello Sport хабарига кўра, у Флорентино Перес билан «Интер»га ўтиши масаласини муҳокама қилади.
Gazzetta нашри хабарига кўра, футболчи Перес билан жентльменлик келишувини тузмоқчи: президент ўз вақтида хорватиялик футболчига, у қачондир ўзи истаса, кетиши мумкинлиги бўйича ваъда берганди.
«Интер» унга нималар ваъда қилмоқда?
Фото: globallookpress.com/D.Nakashima
Барчаси пулга бориб тақалади. Ҳатто гап жуда талантли ва бой футболчилар ҳақида кетганида ҳам. Испания нашрлари ёзишича, Модрич клуб билан янги шартнома бўйича музокара ўтказган аммо унинг йиллик маошини 6,5 миллион евродан 8 миллион еврога оширишга рози бўлишган, холос.
Мавзуга оид
«Интер» эса футболчининг молиявий талабларини бажаришга тайёр. Corriere dello Sport маълумотига кўра, «Интер» Модричга йилига 10 миллион евродан тўлаш назарда тутилган 4 йиллик шартнома таклиф қилишмоқда, бу 40 миллион евро дегани. Қолаверса, футболчи йилига 1,5 миллион евролик бонуслар олиши мумкин. Бу ҳали ҳаммаси эмас, у пенсияга кетишдан аввал Хитойда, «Интер»га эгалик қилувчи Suning компаниясига тегишли бошқа бир жамоада - «Цзянсу Сунин» клубида икки йил ўйнаб, яна 20 миллион евро ишлаб олиши мумкин бўлади. Бу вақтга бориб у 37 ёшга чиқиб бўлади.
«Реал» билан шартномаси 2020 йилгача бўлган хорватиялик қолган вақт давомида кўпи билан 21 миллион евро олиши мумкин. 66 миллион евро қаердаю, 21 миллион қаердаа. Қолаверса, Испанияда Модрич билан ҳам худди Роналду билан бўлгани каби солиқ борасида муаммолар юзага келган, у ўтган йили бир миллион евро миқдорида жарима тўлашга мажбур бўлганди.
Бу муаммолар ўрнига уни Италияда ажойиб шаҳар, хотиржам ҳаёт ва хорватиялик дўстлар давраси кутмоқда.
Модричда Италияга кетиш учун сабаблар бор.
Энди гап 750 млн эмас, 60 млн евро ҳақида кетмоқда. Эҳтимол бу трансфер бутун бир занжирни ҳосил қилар: «Реал» Модрични «Интер»га сотади, унинг ўрнига «Лацио»дан Сергей Милинкович-Савични ёки «Ювентус»дан Миролим Пьянични олади, «Интер» эса Жоау Мариуни «Рома»га қўйиб юборади.
«Реал» Модричга қанчалик боғлиқ?
Модрич жаҳон чемпионатидан «Олтин тўп» билан қайтди, «Реал» Роналду ва Зидансиз қолди – клуб хорватиялик футболчини сотмаслиги кераклиги учун асосий сабаблар. Қолаверса, «Сантьяго Бернабеу»да Лукани жуда қадрлашади: унинг кетишини Кришнинг кетишидан кейин бўлгани каби хотиржамлик билан қабул қилишмайди.
Лекин клубда Флорентино Перес ҳам бор. Унинг муваффақиятлари ностандарт ва парадоксал қарорлари билан боғлиқ.
2005 йилда Перес ҳали бир йиллик шартномаси бор 33 ёшли Луиш Фигуни текинга «Интер»га бериб юборганди.
Фигу ўшанда Чемпионлар лигасида энг яхши ассистентлардан бири бўлганди. Перес Раул, Роналду ва Хаби Алонсо билан ҳам осон хайрлашганди – уларнинг барчаси Фигу каби 33 ёшида жамоадан кетди. Кимлардир ёшроқлигида кетган (Макелеле, Редондо, Роббен, Снейдер), кимлардир кўпроқ ўйнаган (Каннаваро), аммо Перес фахрий футболчиларни кўп ушлаб турмасди, фақат Зидан бундан мустасно.
Сентябрда Модрич ҳам 33 ёшга тўлади – Роналду кетгач, у жамоанинг энг ёши катта футболчиси бўлиб турибди. У жамоада қолса, 2020 йилгача амалда бўлган шартномаси кўп эҳтимолки узайтирилмайди – жамоа уни икки йилдан кейин текинга қўйиб юборишига тўғри келади, бу эса Пересга хос эмас – ёмон бизнес.
Лопетеги Модричдан воз кечишни истамайди. Аммо у Пересга қарши бора олмаслиги аниқ. Модрич кетса, майдонда Иско ва Асенсио учун янги ҳудудлар очилади: бири Модрич ўрнида, иккинчиси қанотда ҳаракат қилади. Бу вазият ҳам ёшлар билан ишлашга ўрганган ва жамоада янги иш бошлаган мураббий учун яхши вазият.
Бу трансфер айтишаётгани каби кутилмаган трансфер эмас. Криштианунинг трансферини эсланг.
Модрич «Интер»да қаерда ўйнайди
Фото: globallookpress
Ҳеч бир итальян клуби Лука Модричдан воз кечмаган бўларди. У тўп билан ҳам, тўпсиз ҳаракатланишда ҳам беназир. Миланликлар жамоасида Лука Хорватия термасидаги дўстлари - Перишич, Брозович ва Врсалько билан бирга тўп суриши, А Сериянинг энг кучли мураббийларидан бири билан ишлаши мумкин.
Бу ёзда Спаллетти 4-2-3-1 ва 3-4-2-1 схемаларини синаб кўрди. Модрич исталган схемага ва исталган позицияга мослаша олади. У 3-4-2-1 схемасида треквартист бўлиши ва Перишичга шериклик қилиши мумкин, 4-2-3-1 схемасида ҳужумкор ярим ҳимоячи ролини бажариши ёки диспетчерлик қилиши мумкин. Ёки 4-1-4-1 схемасида (Хорватия шу схемада ўйнайди): Модрич ва Наингголан яратувчанлик учун ҳам, ҳужумларни қайтариш учун ҳам жавоб беради – орқада уларни Брозович суғурталайди.
Молийвий фэйр-плей бўйича муаммо ҳам бўлмайди: Модрич арзон эмас, аммо қиммат ҳам эмас, Il Giornale нашри 60 миллион евролик трансфер ҳақида ёзмоқда, бу трансфер амалга ошса, «Интер» Жоау Мариу ва Весинони тахминан 50 миллион еврога пуллаб, балансни тўғрилаши мумкин.
Спаллетти ва Лопетеги нима демоқда?
«Интер» устози Лучано Спаллетти Модричнинг трансфери амалга ошишига ишора қилмоқда.
«Мен ва мухлисларимиз бу трансфер амалга ошишини орзу қилмоқдамиз, – дея тан олди Спаллетти. – Клуб бу масала устида иш олиб бормоқда. Бундай даражадаги футболчи бизга жуда керак. Трансферлар ойнаси ҳали яна бир неча кун очиқ туради, умид қиламанки, нимадир рўй беради. Агарда биз Лионель Месси билан шартнома имзоласак ҳам мен хурсанд бўлардим».
«Реал»нинг янги бош мураббийи Хулен Лопетеги эса Модрич Мадридни тарк этмаслигига ишонч билдирмоқда.
«Лука — экстраординар футболчи, биз уни қучоқ очиб кутиб оламиз, – дея Лопетегининг сўзларини келтирган Marca. – Мен у билан телефон орқали гаплашиб, уни жаҳон чемпионатидаги натижа билан табрикладим. Кўрамиз, у 15 август куни Европа Суперкубоги учун ўйинда қатнашармикин. Бу бизнинг янги мавсумдаги илк катта мақсадимиз. Лука — «Реал» футболчиси ва шундай бўлиб қолади».
Модричда Пересга босим ўтказа оладиган агент бор
Фото: globallookpress.com/Giuseppe Maffia
Унинг исми Ваня Боснич. Лука Модричнинг рафиқаси ва агенти, унинг бош танқидчиси ва фаолияти двигатели. Улар 2007 йилда танишишган, ўшанда Ваня Мамичнинг агентлигида ишлаган, кейин компаниядан кетган ва футболчининг шахсий вакилига айланган. Айнан у Модрични «Тоттенҳэм»га олиб ўтган: Лука Загребнинг «Динамо» клубида эканида рафиқаси олдинга ҳаракатланиш зарурлигини англаб етганди.
Айнан у футболчини «Реал»га олиб келган: «Тоттенхэм» Модрични сотишдан бош тортганди. Уятчан ва ювош Лука кутилмаганда раҳбарият билан очиқ жангга кирган: машғулотларга бормаган, клуб билан АҚШга учмаган ва Хорватияда яшириниб ўтирган. Барчаси – рафиқасининг ташаббуси билан.
Gazzetta dello Sport нашрининг ёзишича, айнан Ваня унинг «Интер»га трансферини ўйлаб топган, унинг ўзи миланликларга қўнғироқ қилиб, футболчининг хизматларини таклиф этган. У бу услубни «Тоттенҳэм» ва «Реал» билан ҳам қўллаганди: Модричнинг трансфери рафиқасининг қарорлари. Улар барчасини бирга бошдан кечириб келишмоқда. У Испанияда турмуш ўртоғи билан бирга солиқ қонунчилигидан азият чекди, Хорватияда ҳам Мамич туфайли юзага келган муаммоларни бирга енгиб ўтишганди.
Барибир охирги сўз Пересда қолмоқда. Италияда трансферлар ойнаси 18 август куни ёпилади, 15 август куни эса «Реал» УЕФА Суперкубоги учун майдонга чиқади – кўрамиз Модрич ўша ўйинда бўладими, йўқми?
