«Видалнинг ўрни жуда билинади». Роберт Левандовски ниҳоят гапирди. (тўлиқ интервью)

Ўтган мавсум охирларида Роберт Левандовскининг «Бавария»ни тарк этиши ҳақида миш-мишлар кўпайди. Ҳужумчи ўзини матбуотдан узоқ тутган бўлса-да, «Бавария» омадсиз ўтказган апрель ва май ойлари натижасида пайдо бўлган салбий муҳит ва танқидлар, асосий айбдор сифатида Робертнинг кўрсатилиши ва бошқа ҳолатлар Левандовскининг Мюнхендаги фаолияти якунга қараб кетаётганидан далолат қиларди. Ҳатто «Реал» ва «Манчестер Юнайтед» каби клублар уни сотиб олмоқчи экани ҳақида ҳам хабарлар чиқиб турди.

Аммо таътилдан қайтган Роберт Левандовски янги мураббий ҳамда жамоадошлари билан гаплашиб олди ва яна «Бавария»да қолишга қарор қилди. Апрель ойидан бери биринчи марта немис нашрига интервью берди ҳам. Эътиборингизга польшалик футболчининг Sport Bild нашрига берган интервьюсини ҳавола қиламиз.

- Сиз бир неча ой жим турдингиз ва интервью бермадингиз. Ҳатто Германия суперкубогидаги ҳет-трикдан кейин ҳам ҳеч нарса демадингиз? Нима учун?

- Мен апрелдан буён Германияда интервью бермадим, Польшада эса, фақат терма жамоа мавзусида оғиз очдим холос. Сабаби, ўтган мавсум охирида вазият яхши эмасди. Мен қўллаб-қувватлашни сезмадим. Мени бошқа жамоа мухлислари танқид қилди, мутахассислар танқид қилди, лекин жамоатчилик ҳам, клуб ҳам мени ҳимоя қилмади. Мен ҳақимда жуда кўп ноўрин айбловлар, фикрларни эшитишга мажбур бўлсам-да, жим туришни афзал билдим. Энди эса, гапирсам бўлади.   

- Клуб сизни етарлича қўлламадими?

- Апрелда ва майда деярли ҳамма менга қарши бўлиб қолганди. Клуб мени ҳимоя қилмади ва ўша вазиятда ёлғизланиб қолдим. Икки-уч муҳим ўйинда гол урмаслигимни биламан, дарҳол Левандовскига қарши ўт очишди.  

- Қандай бўлиши керак эди?

- Ҳаммаси жойида бўлса, табиийки, ўз ишимни қилаётган бўламан. Агар муаммо пайдо бўлса, ҳаммасига Левандовски айбдор. Мавсум охирида менда шундай тасаввур уйғонганди. Мен анчадан буён Германиядаман ва тўрт йилдирки, «Бавария»да ўйнаяпман. Мени у ёки бу ўйинда гол ура олмасликда айблаш мумкин, лекин бор кучим билан ҳаракат қилмаётганимни айтишса, бу нотўғри. 

- Бунинг устига, жароҳатлар билан ўйнашга тўғри келди, шундайми?

-  Ҳа, 2017 йилда елкадан жароҳат олдим ва аслида беш ҳафта майдонга тушмаслигим керак эди. Аммо беш кун ўтиб ўйнадим. Ўтган мавсумда етти ой тиззамда муаммо бўлган. Ҳатто ўнг оёқда зарба бера олмасдим ва машғулотларда бу ишни қилмасликка уринардим. Фақат ўйинлар пайтида, қаттиқ оғриқ бўлса-да, ўнг оёқда зарба беришга мажбур бўлардим. Мен рақиб билан эмас, ўз танам билан курашишга мажбур бўлдим. Назаримда, тренажер залида ёки майдонда эмас, физиотерапевт хонасида кўпроқ вақтимни ўтказгандекман. Бу менга жисмоний, ҳамда руҳий томондан қийинчилик туғдирди, аммо майдонда бор имкониятимни сарфлашга уриндим.   

- Сизни кўпроқ муҳим ўйинларда гол урмасликда айблашади.

- Ҳа бу мени хафа қилади. Гол ура олмаганимдан кейин, мени танқид қилиш осон. Аммо менинг матбуотга бориб нолишга одатланмаганман, ҳаммасини майдонда исботламоқчиман. 

- Яна қандай айбловлар сизга оғир ботди?

- Баъзида жуда кулгили гаплар ҳам бўлди. Нима эмиш, мен фақат ўз ҳақимда ўйлаб, жамоага қарши чиқаётган эканман. Агар уч тўрт марта шундай гапларни эшитсанг, албатта, хайрон бўласан – нима бўляпти ўзи? Шунчалик муаммо туғдираётган эканман, ҳамма менга қарши экан, нега бу ерда қолишим керак? Шунинг учун жамоани тарк этиш ҳақида ўйлай бошладим. Жаҳон чемпионати олдидан менга бир қатор таклифлар бўлди ва мен уларни кўриб чиқдим. 

- Кетиш ҳақида жиддий ният борми энди? Ёки кейинроқми?

- Мен ўттиз ёшдаман. Мен «Бавария»га керак эканимни биламан. Яна уч йиллик шартномам бор. Мен клуб манфаатига қарши бориш, машғулотлардан воз кечиш каби аҳмоқона ишлар қилмайман. Энди кетиш ҳақида ўйламаяпман.

- Пини Захави – машҳур агентингиз, май ойида клубни тарк этмоқчи эканингизни айтди. 

- Ҳа, бундан хабарим бор, Пини менинг розилигим билан бу гапларни айтган. Юқорида айтганимдек, оғир дамлар эди ва ўзимни Мюнхенда яхши ҳис қилмаётгандим. 

- Ҳозир кайфиятингиз қандай?

- Мен Нико Ковач билан гаплашдим, суҳбатимиз жуда яхши ўтди. У мен нимани ҳис қилаётганимни тушунди. Жамоадошларим билан ҳам муносабатларим яхши, ҳеч қандай салбий мулоқот бўлмади. 

- Нико Ковач билан иккинчи суҳбатдан кейин умуман кетмасликка қарор қилган экансиз?

- У менга жамоани қандай ташкил қилмоқчи экани ва ундаги менинг аҳамиятим ҳақида тушунтирди. Менга ёқди. Ўша суҳбатдан кейин қолишга қарор қилдим. Мен ҳам машина эмасман, биламан, балки мен ҳам хато қилгандирман. 

- Хённесс ва Румминигге билан муносабатларингиз қандай?

- Улар билан ҳали гаплашмадим, лекин ўйлайманки, яқинда шундай суҳбат бўлиб ўтади. Мен эркакча суҳбатлашиб, ҳаммасини ўз ўрнига қўйиб олмоқчиман. Мен барчасини юзма-юз ҳал қилиш, орқадан гапирмаслик тарафдориман. 

- Ҳасан Салихамиджичнинг айтишича, сиз дунёдаги энг яхши ҳужумчи экансиз.

- Хурсандман. Шунингдек, мени ҳар қандай вазиятда олиб қолмоқчи бўлишгани ҳам хурсанд қилади. «Бавария» менинг трансферим борасида ҳеч ким билан музокара ўтказмасликни истади ва бу мен учун катта маънони беради. Демак, мен ҳали ҳам керак эканман ва бу клуб учун боримни беришда давом этавераман. 

- Ёзда қийин бўлгандир?

- Аксинча. «Реал» дарвозасига ярим финалларда гол ура олмаганим, кубок финалидаги мағлубият, муваффақиятсиз жаҳон чемпионати – буларнинг барчаси мен учун стимулга айланди. Шунинг учун яна голлар уриш ва совринлар ютишни янада кўпроқ хоҳлаяпман. 

- «Бавария» бу мавсумда нималарга эриша олади?

- Бу ҳақда гапирмасликни ўргандим. Кўпинча, ҳаммаси яхши кетаётган бўлади, кейин эса, бирданига, жароҳатлар, қизил карточка ёки вазиятларнинг кўкка совурилиши кўпайиб кетади. Фақат апрелга бориб, Чемпонлар Лигасида ғолиб чиқиш имкониятимиз ҳақида гапириш мумкин. Бир нарсани аниқ айтишим мумкинки, Артуро Видалнинг ўрни жуда билинади. У ҳар доим энг керакли нуқтада пайдо бўладиган ва ёрдамга шай бўладиган футболчи. Ундайлар ҳозир кам.