Осиё ўйинларида илк марта ўзбек миллий кураши бўйича баҳслар ўтказилмоқда.
Ўзбекистон жамоаси мусобақаларда ўз иштирокларини муваффақиятли давом эттиришмоқда.
-66кг вазн тоифасида Ўзбекистон шарафини ҳимоя қилаётган Маъруф Ғайбуллоев саралаш босқичида мезбонлар вакили - Тимур Априлианда Адини 10:0 ҳисобида мағлуб этди. Нимчорак финалда у филиппинлик Ламас Ал Роланни таслим этди - 10:0.
Ғайбуллоевнинг чорак финалдаги рақиби туркманистонлик Марат Ўразов бўлди. Ўзбекистонлик спортчи бу рақибни ҳам 10:0 ҳисобида мағлуб этиб, ярим финалга йўл олди.
Энди унинг ярим финалда эронлик Ганбари Ганбаралига қарши гиламга чиқади.
Ўзбекистоннинг -66кг вазн тоифасидаги яна бир вакили Руслан Бўриев ҳам айни вақтда ярим финалда.
Саралаш босқичида мўғулистонлик Басандаш Жаргалсайхонни мағлуб этган Бўриев, нимчорак финалда непаллик Тапа Упендрани, чорак финалда афғонистонлик Муҳаммад Юсуф Шуайбни енгди ва ярим финалга чиқди.
Энди у финал йўлланмаси учун хитой тайпейилик Чан Хаоченгга қарши гиламга чиқади.
Эътиборлиси, Ўзбекистоннинг -66 кг вазн тоифасидаги вакиллари Руслан Бўриев ва Маъруф Ғайбуллоев ярим финалда ғалаба қозонса, финалда ўзаро тўқнаш келади.
+90 кг вазн тоифасидаги Нурбек Тўраев ҳам ярим финалга чиққан.
У саралашда ливанлик рақиби Фадел Жадни 10:0 ҳисобида мағлубиятга учратди ва 1/8 финалга йўл олганди. Нимчорак финалда унга мўғулистонлик Баярсайхон Темулин рақиб бўлди. Тўраев кучли рақибни ҳам осонлик билан мағлуб этди - 10:0.
Шундан сўнг Тўраев чорак финалда афғонистонлик Абдулбосир Раҳмоний тўсиғидан ўтиб, ярим финалга чиқди. Энди у финал йўлланмаси учун эронлик Жафар Паҳлавонийжагарҳ билан беллашади.
Ўзбекистоннинг +90 кг вазн тоифасидаги вакили Муҳсин Ҳисомиддинов иштирокини нимчорак финалдан бошлади.
Дастлаб япониялик Татсуми Кавагучини таслим этган Ҳисомиддинов чорак финалда Хитой Тайпей вакили Ли Пойенни мағлуб этди ва ярим финалга чиқди. Унинг ярим финалдаги рақиби афғонистонлик Мансур Сарвари бўлади.
Агар Нурбек Тўраев ва Муҳсин Ҳисомиддинов ярим финалда муваффақият қозонса, финалда ўзаро гиламга чиқиб, олтин ва кумуш медалларни ўзаро тақсимлаб олиши мумкин.
