Индонезияда бўлиб ўтаётган Осиё ўйинларида илк марта ўзбек миллий кураши бўйича баҳслар бошланди.
Бугун Ўзбекистон жамоасининг 6 нафар вакили баҳсларга қўшилди. Ўзбекистонлик курашчилардан 4 нафари саралаш босқичида иштирокини бошлади ва 4 спортчи ҳам илк баҳсларда ғалаба қозониб, нимчорак финалга чиқди.
Дастлаб гиламга чиққан, -66кг вазн тоифасида Ўзбекистон шарафини ҳимоя қилаётган Маъруф Ғайбуллоев мезбонлар вакили - Тимур Априлианда Адини 10:0 ҳисобида мағлуб этди.
-66кг вазн тоифасида гиламга чиққан бошқа бир ўзбекистонлик спортчи Руслан Бўриев эса мўғулистонлик Жаргалсайхонни мағлуб этиб (1:0), кейинги даврага йўл олди.
+90 кг вазн тоифасидаги Нурбек Тўраев ҳам илк жангида ливанлик рақиби Фадел Жадни 10:0 ҳисобида мағлубиятга учратди ва 1/8 финалга йўл олди.
Иштирокини саралашдан бошлаган, -52 кг вазн тоифасидаги Гулнора Сулаймонова ҳам индонезиялик Мая Сари Сембирингга ҳеч қандай имконият қолдирмади - 10:0.
Бугун Ўзбекистоннинг яна икки вакили чорак финалда ўз иштирокини бошлайди. Булар -52 кг вазн тоифасидаги Ойсулув Абдумажидова ҳамда +90 кг вазн тоифасидаги Муҳсин Ҳисомиддинов. Абдумажидованинг илк рақиби туркманистонлик Анастасия Макаева бўлади, Ҳисомиддинов илк баҳсни япониялик Татсуми Кавагучига қарши ўтказади.