Тожикистон Ўзбекистон туфайли электр энергияси экспорти режасини ортиғи билан бажарди

Тожикистондан Ўзбекистонга электр энергияси экспорт қилиш ҳажмининг ўсиши жорий йилнинг иккинчи ярми бошланиши билан юз берди. Жорий йилнинг июль ойида Ўзбекистонга 417 миллион киловатт-соат электр энергияси етказиб берилди. Бунга қадар Ўзбекистонга 110-120 млн киловатт-соат ҳар ойда экспорт қилинган, дейилади «Тожикистонда мониторинг ва эрта огоҳлантириш» ҳисоботида. Бу ҳақда «ASIA-Plus» ёзмоқда.

Тожикистон бу йил апрель ойидан бошлаб тўққиз йиллик танаффусдан сўнг Ўзбекистонга электр энергиясини етказиб бера бошлади. Кутилишича, жорий йилнинг охиригача Тожикистон Ўзбекистонга камида 1,5 миллиард киловатт-соат электр энергияси экспорт қилади.

Икки мамлакат электр энергетика компаниялари томонидан эришилган келишувларга мувофиқ, Ўзбекистон ёзги даврда Тожикистондан электр энергиясини ҳар бир киловатт учун икки центдан, қишда - 2,5 центдан сотиб олади.

ЕХҲТ кўмагида мамлакат Иқтисодий тараққиёт ва савдо вазирлиги томонидан ҳар ойда тайёрланувчи ҳисоботда айтилишича, шу йилнинг июль ойида Тожикистон ишлаб чиқарилган электр энергиянинг 30,2%ини экспорт қилди.

Ўзбекистонга экспортнинг тикланиши ва ҳажмининг оширилиши Тожикистонга йилнинг иккинчи ярми бошидаёқ 2018 йилга режалаштирилган электр энергияси экспорти ҳажмидан ошиш имконини берди. Жорий йилнинг бошидан буён республика 1 миллиард 557 миллион киловатт-соат электр энергияси экспорт қилди.