Петров ва Боширов барчасини рад этди. Уларга ким ишонади?

Буюк Британия ҳукумати ва махсус хизматлари томонидан Солсбери шаҳрида Россия Разведка бошқармасининг собиқ полковниги Сергей Скрипаль ҳамда унинг қизи Юлия Скрипални заҳарлашда айбланган россиялик Александр Петров ва Руслан Боширов ўзларини Буюк Британияга борган сайёҳлар деб маълум қилишди. Улар ўзларини вазият қурбони деб аташган. Аммо уларнинг сўзлари британ полицияси маълумотларига мос келмайди. «Би-би-си» шу ҳақда материал тайёрлади.

Буюк Британия ҳукумати томонидан Россия Разведка бошқармаси жосуслари деб аталган бу шахслар RT телеканали бош муҳаррири Маргарита Симоньянга интервью беришган. Аввалига Британия полицияси улар сохта исмлар билан виза олиб, Буюк Британия ҳудудига киришганини билдирганди.

RT эфирида кўриниш берган шахслар Буюк Британия полицияси тарқатган суратлардаги шахслар бўлиб, улар интервью давомида ҳақиқатан март ойи бошида Солсберида бўлишганини тан олишган. Лекин улар Разведка бошқармаси ходимлари эмаслигини таъкидлашиб, фитнесс бизнеси билан шуғулланишларини, Буюк Британияга сайёҳлик ва хусусий ишларини бажариш мақсадида боришганини айтишган.

Улар Скрипалларга ҳужумга алоқадорлик ҳақидаги барча даволарни рад этишган. Улар Скрипаллар ҳақида аввал эшитишмаганини айтиб, Разведка бошқармасида ишламасликларини такрорлашган.

Аммо уларнинг жавобларидаги айрим жиҳатлар янги саволларни пайдо қилади.

1. Ғалати туристик маршрут

«У ерда машҳур собор бор. Солсбери собори. Уни бутун Европада ва бутун дунёда яхши билишади. У ўз гумбазлари баландлиги 123 метрлиги билан ажралиб туради. У ўз соатлари билан ҳам машҳур», дея такрорлашган Петров ва Бошироқ худди энциклопедиядан иқтибос келтиргандек.

Петров ва Боширов уларга дўстлари аввалдан ушбу соборни бориб кўришни маслаҳат қилиб келишганини айтишган. Айтишлари бўйича 4 март куни (Скрипаллар заҳарланган кун) улар Солсберига бориб, соборни зиёрат қилишган, паркни айланишган, қаҳва ичишган, инглиз готикасидан завқланишган. «Собор жуда чиройли эди, у ерда кўплаб туристлар, рус тилида сўзлашадиган бошқа туристлар ҳам бор эди», дейди Боширов. Скрипаллар уйи олдидан ўтишгани ҳақидаги саволга улар ишонч билан жавоб бера олишмган: «Биз Скрипалнинг уйи қаердалигини билмаймиз! Ўша кўчадан балки ўтгандирмиз, балки ўтмагандирмиз».

Ҳолбуки, янгиликлардан барча Скрипаллар уйи қаерда жойлашганини билиб бўлишганди. Бу уй шимолий вокзал яқинида, «россиялик туристлар» келган жойда жойлашган. Полиция тарқатган суратларда Боширов ва Петров Скрипалнинг уйи жойлашган кўчадан ўтгани тасвирланган, аммо улар Солсбери соборига боргани ҳақидаги суратлар йўқ. Қолаверса, Скрипалнинг уйи туристик ҳудудда жойлашмаган. Солсбери собори эса бутунлай қарама-қарши томонда жойлашган.

Петров ва Боширов Скрипаллар уйи эшигига заҳарли модда қўйилган вақтда шу ҳудудда бўлишган. Полиция маълумотига кўра, Сергей ва Юлия Скрипаль илк марта уйдан соат 09:00дан чиққан ва 11:00да қайтишган. Улар уйда тахминан 1,5 соат вақт ўтказиб, тахминан 13:00-13:30 атрофида яна ташқарига чиқишган. Улар соат 16:15 атрофида ҳушсиз ҳолда топилган. Петров ва Бошировни соат 11:58да Скрипалнинг уйидан 300 м масофада кўришганди.

Боширов ва Петров интервью вақтида «паркни айланишгани» ҳақида айтишган. Улар парк номини айтишмаган, собор яқинида эса қиролича Елизавета номидаги парк жойлашган. Айнан шу ердан кейинроқ икки британиялик «Новичок» моддаси солинган атир идишини топиб олишган, улардан бири дарҳол вафот этганди.

2. Ноқулай об-ҳаво

Британ полицияси текширувларидан аниқландики, Петров ва Боширов Солсберига икки марта, 3 ва 4 март кунларида боришган. Британ полициясининг тахмин қилишича, биринчи ташрифдан мақсад «ҳудудни ўрганиш» бўлган.

Англияга 3 кун муддатга келадиган сайёҳлар одатда кунига 50 фунтлик арзон меҳмонхоналарга буюртма беришади. Лондон ташқарисидаги, у қадар машҳур бўлмаган объект учун йўлкиранинг ўзига 150 фунт сарфлаш одатий эмас.

Улар 3 март куни Солсберига келишган ва шаҳарда «қорли бўрон» бўлаётганига дуч келишган. «Шаҳарни айланмоқчи эдик. Аммо шаҳар қорга бурканди, биз ярим соатда ҳўл бўлиб кетдик», дейди Петров. «Ҳеч қайси нашрда 3 март куни шаҳарда қорли коллапс бўлиши ҳақида маълумот берилмаганди. У ерда ҳаракатланиб бўлмасди», дея унга қўшимча қилган Боширов. Шу туфайли улар сайрни 4 мартга қолдиришган.

Англияда март ойи бошида ростlан ҳам «қорли коллапс» бўлган, аммо бошқа кунларда. «Шарқ махлуқи» номли биринчи шторм февраль ойи охирида келган ва мамлакатнинг бир қанча ҳудудларида транспорт билан муаммолар пайдо бўлган. «Эмма» номли иккинчи шторм эса Англияда 1 ва 2 март кунлари кузатилган. 

ОАВнинг ёзишича, россияликлар Солсберига борган 3 март куни «Эмма» Британия ороллари ва Ирландия ҳудудини тарк этиб бўлганди, ҳеч қандай қорбўрон ҳам бўлмаганди. Шаҳарда озроқ қор ёғган, аммо у тезда тозалаб қўйилган, шаҳарнинг марказий кўчаларида «қорнинг изи қолмаганди».

3. Петров ва Гатвик аэропортидан қандай чиқишганини эслай олишмади

Полиция томонидан эълон қилинган суратларда Петров ва Боширов Гатвик аэропортидан йўлакларда алоҳида чиқиб келишган. Интервью вақтида Симоньян улардан бу ҳақда сўраб, суратларни кўрсатди.

Улар эса буни рад этишди. «Биз ҳеч қачон бир-биримиздан айрилмаганмиз. Буни улар қандай қилиб уддалашган, билолмадик. Менинг инглизчам яхшироқ, шунинг учун ҳамиша ёнма-ён эдик. Аксинча бўлса, эслардик», деган Петров.

Суратлар бир вақтда олинган. Аммо турли жойларда ва турли камералар орқали. Полиция бу суратларда россияликларнинг турли турникетлар орқали кираётгани тасвирланганини айтмоқда, аммо Боширов ва Петров бундай бўлиши мумкин эмаслигини таъкидлашмоқда.

4. Мулксиз мулкдорлар

Петров ва Боширов ўзлари ҳақида гапиришни исташмади. Уларнинг сўзларига кўра, улар «воситачи тадбиркорлар»дир. «Қисқаси, фитнес-индустрия. Спортчиларнинг озиқ-овқат маҳсулотлари, витаминлар, микроэлементлар», дея жавоб беришган улар. Шу билан биргаликда, улар ўз ҳамкорлари ва мижозлари , танишларини ноқулай аҳволга туширмаслик учун бу борада батафсил маълумот беришни исташмаган.

Уларнинг айтишича, тез-тез Европага, «асосан Швейцарияга» учишади. Улар у ерларда «музокаралар ўтказишади ва шунчаки саёҳат қилишади».

Аммо Россия давлат реестрида Петров ёки Боширов алоқадор бўлган компания рўйхатга олинмаган. ЕГРЮЛда Руслан Баширов номидаги бирорта юридик шахс йўқ. Амалда фаолият юритаётган ва фаолият юритмаётган юридик шахслар қаторида ягона «Руслан Баширов» номи учрайди. Аммо Баширов номига фитнес билан шуғулланадиган компания очилмаган.

«Александр Петров» - жуда кенг тарқалган исм-шариф. Аммо бундай исм-шарифли фитнес-мураббий Россияда йўқ.

5. Петров ва Боширов «Скрипаллар иши» ҳақида ҳеч нарса билмаслигини тасдиқлашди

«Мен бу вазиятгача Скрипаллар ҳақида эшитмагандим. Биз ҳақимизда ёза бошлашмагунича, бу фамилияни эшитмагандим, улар ҳақида ҳеч нарса билмасдим», дейди Боширов.

Интервьюнинг давомида улар ўз фамилиялари барча нашрларда қайта-қайта тилга олинаётганидан безор бўлишганини айтишган.

Бундан келиб чиқадики, улар ОАВни кузатиб боришади, ОАВ эса март ойи бошидан буён Скрипаллар ҳақида бонг уриб келмоқда. Улар Маргарита Симоньянга унинг телеграм канали орқали алоқага чиқишганини айтишган. Бу телеграм каналда эса 17 марта Скрипал иши ҳақида маълумот берилган.

Бундан ташқари, Баширов ва Петров сиёсатчи Дмитрий Гудков улар ҳақида маълумот учун мукофот ваъда қилгани ҳақида ҳам билишади.

Уларнинг сўзларига кўра, Путин гумонланувчилардан ОАВ орқали чиқиб, ўзларини танитишни сўрагач, ўзларини тинч қўйишларига умид қилган ҳолда, Симонянга боғланишган.

«Шунчаки, бизни тинч қўйишларини истаймиз. Буларнинг барчаси тасодиф. Бизнинг айбимиз нима?», дейди Боширов.