Европада футбол аста-секинлик билан тезликни оширмоқда. Кечагина жамоалар Европа Лигаси гуруҳ босқичида дастлабки турни ўтказишган бўлса, бир кун ўтмай, бугундан миллий чемпионатларда навбатдаги тур бошланади.
Дам олиш кунларининг эътиборга молик учрашувлар анонси билан «Tribuna.uz» ҳам бу ўйинларга алоқадорликда давом этади.
Бундеслигадан Чемпионлар Лигасида қатнашаётган, яъни ўтган мавсумнинг омадли 4 жамоаси бу ҳафта ўзаро ўйинларда майдонга тушишади.
«Ҳоффенҳайм» ҳам, «Боруссия» ҳам еврокубокдаги илк ўйинларини яхши ўтказишди. Дортмундликларнинг ғалабаси аввалдан кутилган бўлса, «Ҳоффенҳайм» сафарда «Шахтёр» билан дуранг ўйнади. Жуда кўп асосий таркиб футболчилари жароҳат олган Нагельсман жамоаси учун Донецкда мағлубиятга учрамаслик ҳам катта натижа.
«Вирсол Рейн» стадиони дортмундликлар учун жуда ноқулай эканини таъкидлаш керак. Бу стадионда ушбу жамоалар ўртасида ўтказилган сўнгги 8 ўйинда «Боруссия» атиги 1 маротаба ғалаба қозонган холос. Масалан, ўтган мавсумда шу стадионда ўтган ўйин 3:1 ҳисобида майдон эгаларининг ғалабаси билан тугаганди. 3 турдан сўнг 7 очко жамғариб, «Бавария»ни таъқиб қилаётган жамоа учун эса, ҳар ўйинда ғалаба қозониш шарт экани шубҳасиз.
Таркибларга келсак, мезбонлар таркибида тикланиб улгурган футболчилар йўқ. Хюбнер ҳам, Амири ёки Рупп ҳам тикланиш жараёнини давом эттирмоқда. Меҳмонлардан эса, янги ҳужумчи Пако Алкасернинг майдонга тушиши сўроқ остида. Шунингдек, португалиялик ҳимоячи Рафаел Геррейро жароҳатидан фориғ бўлди ва асосий таркибда бўлмаса ҳам, балки захира ўриндиғида пайдо бўлиб қолиши мумкин.
«ШАЛЬКЕ» – «БАВАРИЯ» (22 сентябрь, 21:30)
Иккинчи жуфтлик янада жаранглироқ. «Шальке» фақат ўтган йилнинг ҳурмати ва ҳозирда Чемпионлар Лигасида иштирок этаётгани учун учрашув аҳамиятини оширмоқда холос, зеро жамоанинг янги мавсум стартига ҳавас қилиб бўлмайди. Тўғри, ҳозирча жамоа жуда қийин тақвимга тушиб қолган, «Вольфсбург», «Ҳерта» ва менхенгладбахликлар анойи рақиб эмас, аммо бу ўйинларда ҳеч бўлмаса 1 очко олиш керак эди. Бунинг устига, анча қулайроқ бўлган гуруҳда ЕЧЛ ҳам у қадар яхши бошланмади – «Порту»га қарши уй ўйинида ғалаба ушлаб қолинмади – 1:1.
«Бавария» эса, ҳар сафарги режимда, Германия кубоги ва Суперкубогидан тортиб, барча Бундеслига ўйинлари, шу билан бирга Чемпионлар Лигасидаги сафар учрашуви ҳам ғалаба билан якунланди. Янги мураббий Нико Ковач қўл остида жамоа жуда прагматик ва самарали ўйин кўрсатмоқда.
Мавзуга оид
«Шальке» «Бавария» устидан сўнгги 22 ўйинда атиги 3 марта ғалаба қозонган, унинг ҳам охиргиси 2011 йилнинг март ойига тўғри келади. У пайтларда «Шальке» Европа Чемпионлар Лигасининг доимий иштирокчиси эди. Шундан буёғига «Шальке» атиги уч маротаба дуранг қайд этди холос, бошқа барча учрашувлар «Бавария» устунлигида тугаган. Жамоалар роппа-роса бир йил олдин – 19 сентябрда ҳам худди шу стадионда тўқнаш келишган ва меҳмонлар 3:0 ҳисобида ғалабага эришганди.
«ВЕСТ ҲЭМ» – «ЧЕЛСИ» (23 сентябрь, 18:00)
Жамоалар турнир жадвалида бир-биридан жуда узоқ жойлашишган. «Челси» 5 ўйинда юз фоизлик натижани кўрсатиб, пешқадамлик қилаётган бўлса, «Вест Ҳэм» бу сафар ҳам ёмон бошлади – дастлабки тўрт ўйинда мағлубиятга учради. Лекин бу ўйинга алоҳида эътибор қаратиш учун бир қатор сабаблар бор.
Биринчидан, «Вест Ҳэм» ижобий курсга тушиб олгандек, чунки «Эвертон» майдонидаги ишончли ғалаба эътирофга лойиқ. Бу ўйинда жамоанинг янги харидлари ҳам ўзларини кўрсатди – Ярмоленко дубль қайд этган бўлса, «Лацио»дан сотиб олинган бразилиялик Филипе Андерсон жамоа таркибида энг яхши баҳо олган футболчи бўлди. Демак, «Вест Ҳэм» ўз ўйинини топиб бормоқда.
Икккинчидан, бу дерби. Лондон дербилари ўзининг муросасизлиги ва кутилмаган натижалари билан эътибор тортиб келган. Масалан, «Вест Ҳэм» ўз майдонида «Челси»га қарши ўтказилган охирги 4 ўйиндан 3тасида ғалаба қозонган. Ахир бу мавсумларнинг иккитасида «Челси» чемпион бўлган, лекин бу ҳам «Вест Ҳэм»ни шаштидан қайтара олмаган.
Ўйин якшанба куни бўлиб ўтади. Пайшанба оқшомида эса, «Челси» Европа Лигаси доирасида Грецияга сафар қилди. Сарри баъзи етакчи футболчиларига дам берган бўлса-да, умумий ҳолат юзасидан «Вест Ҳэм» жисмонан тетикроқ бўлиши ва бу ҳам мезбонларга устунлик яратиши мумкин. Хуллас, қўшимча шартлар гўёки «Челси»нинг ниҳоят очко йўқотишидан далолат қилмоқда. Кўрамиз, Маурицио Сарри бу синовдан ўз шогирдларини қандай олиб чиқаркин?
«АРСЕНАЛ» – «ЭВЕРТОН» (23 сентябрь, 20:00)
Европа Лигасида АПЛни ҳимоя қилган яна бир Лондон клуби ҳам шу куни майдонга тушади. Дастлабки 4 турни мағлубиятсиз ўтказган «Эвертон» юқорида айтилганидек, дастлабки мағлубиятига учради.
Аммо «Эвертон» ҳам мавсум бошидаёқ жароҳатлар гирдобида қолганди. Масалан, ҳимоя чизиғида тўп суриши керак бўлган деярли барча футболчилар лазаретдан чиққанлари йўқ. Майкл Кин ва Фил Жагелка, шунингдек, ёзда «Барселона»дан сотиб олинган Йерри Мина ҳам жамоага ёрдам бера олишмаяпти. Лейтон Бейнс яхши спорт формасида эмас. Натижада, ҳимояда асосан ёш футболчилар тўп суришга мажбур бўлишмоқда.
«Арсенал» мавсумни икки мағлубият билан бошлади. «Манчестер Сити» билан ўйинда умуман имконсиз кўринган Эмери шогирдлари «Челси»га қарши ёмон ўйнашмади. Жамоада ҳаммаси жойида экани кейинги ўйинларда исботини топди ва «Арсенал» қаторасига уч ўйинда ғалаба қозонди. Бу ўйинларнинг иккитаси сафарда ўтганди.
«Арсенал» кеча Европа Лигасида майдонга тушди. Бу ҳам меҳмонларга бироз устунлик бериши турган гап, лекин Эмерида вазиятни ўзгартирадиган қадар ноқулайлик йўқ. Чунки, «Челси»дан фарқли равишда «Арсенал» ЕЛ ўйинини ҳам, «Эвертон»га қарши ўйинни ҳам ўз майдонида ўтказмоқда.
Дарвоқе, бу жамоалар тўқнашуви доимо голларга бой ва қизиқарли кечса-да, умумий кўрсаткичлар бўйича «Арсенал» яққол устунликка эга. Сўнгги 18 ўйинда «Эвертон» атиги икки маротаба ғалаба қозонган. «Эмирайтс»да ўтган сўнгги 4 ўйинда мезбонлар ишончли ғалабани қўлга киритишган.
ЦСКА – «СПАРТАК» (23 сентябрь, 21:00)
Авваллари Москва дербиси дейилганда асосан «Динамо» ва «Спартак» тўқнашуви тушунилган бўлса, кейинчалик, сўнгги 30 йилда ҳам дейиш мумкин, қизилларнинг армиячилар билан ўйини Россиядаги энг катта дербиси сифатида қарши олинадиган бўлди. Чемпионатдаги ўйинлар эътибори билан ҳам, мухлислар сони бўйича ҳам бу икки жамоа бир-бирига муносиб ва ҳар доим жуда қизғин курашларга бой дербини намойиш қилиб беришади.
Бу сафар турнир нуқтаи назаридан ҳам муҳим – «Спартак» 7 ўйиндан 14 очко жамғариб, «Зенит»ни олдинга қўйиб юбормасликка уринаётган бўлса, ЦСКА у қадар узоқда эмас. Бу ўйиндаги ғалаба билан ЦСКА «Спартак»ни қувиб ўтиши ва 2-ўринга чиқиб олиши мумкин.
Чемпионатда икки жамоа тескари йўналиш ҳосил қилишди: «Спартак» мавсумни яхши бошлаб, сўнгги турларда очко йўқотишни бошлаган бўлса, ЦСКА ўз ўйинини топиб боряпти ва сўнгги икки ўйинда йирик ғалабага эришди. Чемпионлар Лигасида ҳам Пльзенда мағлубиятдан қутулиб қолди. Бу борада Европада ҳам «Спартак»да ишлар ёмонроқ. Европа Лигаси доирасидаги «Рапид»га қарши ўйинда 0:2 ҳисобида мағлубиятга учралди. Бу пасайиш қайсидир маънода жамоа етакчиси Квинси Промеснинг кетгани билан ҳам изоҳланар балки. Олдинги чизиқда «Спартак»ка етакчилик қила оладиган моҳир футболчи етишмаяпти.
«ЛИОН» – «МАРСЕЛЬ» (23 сентябрь, 23:55)
Икки «Олимпик» ўтган мавсумда Чемпионлар Лигаси йўлланмаси учун кескин кураш олиб боришган ва оқибатда лионликлар улоқни илиб кетишганди. Ҳозирча балки навбатдаги ўйин ҳисобланган, аммо мавсум якунига жуда катта таъсир қилиши мумкин бўлган ўйин Франциянинг 6-турини безайди.
«Ним»дан қабул қилинган мағлубиятни айтмаса, «Марсель» жуда кучли кўринмоқда, анча сермаҳсул ўйин, Товен – Пайет жуфтлиги, «Монако» майдонидаги ғалаба... «Лион» бироз сояда қолаётганди, лекин Чемпионлар Лигасида «Манчестер Сити» устидан сафардаги ғалаба бутун Европага «Лион»ни намойиш қилиб берди. Товен – Пайет тандемидан кам бўлмаган жуфтлик Депай ва Фекир яна катта саҳнада.
Манчестерда ўзига бўлган ишончни чўққига олиб чиққан «Лион» энди Францияда ҳам вазиятни ўнглашга киришади. Олдинда эса, юқори ўринларда турган «Марсель» ва «Дижон» билан ўйинлар кутиб турибди.
Ўзаро ўйинларда «Лион» яққол устунликка эга, зеро ўтган мавсумда ҳам ҳар икки ўйинда «Лион» ғалаба қозонганди. Айниқса, Марселдаги ўйиннинг сўнгги дақиқаларида Мемфис Депай узоқ масофадан гол уриб, 3:2 ҳисобидаги ғалаба олиб келганди. Умуман, Франция кубогини қўшмаса, «Марсель»нинг «Лион» устидан ғалаба қозонганига анча бўлди. Қаторасига 8 ўйин, 2014 йилнинг май ойидан бери марселликлар ғалаба қозона олишмаяпти.
Таркибларга келсак, «Лион»да ҳаммаси жойида. «Марсель»да ниҳоят асосий дарвозабон Манданда қайтиши мумкин. Одил Рами ва Роландо жамоага ёрдам бера олишмайди.
