Комил Рашидов: «Дўстлик» НЎП Қирғизистон фуқаролари учун ёпилмаган

Ўзбекистон Республикасининг Қирғизистондаги элчиси Комил Рашидовнинг «Вечерний Бишкек» нашрига хабар беришича, Қирғизистон-Ўзбекистон чегарасидаги «Дўстлик» назорат-ўтказиш пункти одатий режимда ишламоқда.

«Назорат-ўтказиш пункти ёпилмади. Чегарачилар чегара бўйлаб фуқароларни тартибга риоя этган ҳолда ўтказмоқда», - дея аниқлик киритган дипломат.

Шунингдек, Комил Рашидовнинг қўшимча қилишича, Ўзбекистон Чегара хизмати фуқароларнинг ҳар икки томонга ўтиши муаммоларсиз ва ортиқча кечиктиришсиз амалга ошиши тарафдори. Билдирилишича, назорат-ўтказиш пункти халқаро мақомга эга ва кунига 24 соат ишлайди. 

Эслатиб ўтамиз, аввалроқ қирғизистонликлар Ўзбекистон ҳудудига киритилмаётгани ҳақида хабарлар тарқалганди. «Дўстлик» назорат-ўтказиш пунктидан (НЎП) олинган видеони вазиятга гувоҳ бўлганлардан бири Facebook’да эълон қилди.