АҚШнинг собиқ мудофаа вазири Дональд Рамсфельднинг компанияси томонидан ишлаб чиқариладиган препаратнинг Грузия фуқароларида синовдан ўтказилиши вақтида ўнлаб одамлар ўлган. Бу ҳақда Россия мудофаа вазирлиги берган ахборотга иқтибос келтирган ҳолда “РИА Новости” ахборот агентлиги маълум қилди.
Аввалроқ Грузиянинг собиқ давлат хавфсизлиги вазири Игорь Гиоргадзе АҚШ президенти Дональд Трампга Тбилиси яқинидаги Ричард Лугар номидаги лаборатория фаолиятини тергов қилиш илтимоси билан мурожаат қилган. Гиоргадзе 2015 йил декабрда лабораторияда гепатит С’дан даволанишдан кейин 30 киши ўлгани ҳақида маълумот келтирган. 2016 йил апрели ва августида шу сабабга кўра мос равишда яна 30 ва 13 киши вафот этган. Гиоргадзенинг таъкидлашича, қоғозларда ушбу одамларнинг номлари келтирилмай, уларга берилган рақам, уларнинг туғилган санаси ва қайси жинсга мансублиги ҳақидаги маълумот кўрсатилган.
Россия мудофаа вазирлигида Гиоргадзенинг тергови натижалари ўрганилиб, лабораторияда одамлар устидан тажрибалар ўтказилиши ҳақидаги хулосага келинган.
“Намойиш қилинган ҳужжатлардан тажрибалар беморлар ўртасида оммавий ўлим билан тугаганини кўриш мумкин. 2015 йил декабрининг ўзида 24 киши ўлганига қарамай, тажрибалар халқаро стандартлар бузилган ҳолда ва беморларнинг истагига қарши давом эттирилган. Бу эса яна 49 кишининг ўлимига олиб келган”, деб таъкидлаб ўтган Россия қуролли кучларининг радиацион, кимёвий ва биологик ҳимоя қўшинлари бошлиғи Игорь Кириллов.
