Кремл Россия президенти Владимир Путиннинг АҚШ президенти махсус вакиллари Стив Уиткофф ва Жаред Кушнер билан ўтказган музокараларини ижобий баҳолади.

Россия президенти матбуот котиби Дмитрий Песков 7 сентябр куни учрашувни «тинчлик сари кичик қадам» деб атади. Унинг таъкидлашича, Москва Украинадаги урушни тугатишга қаратилган америкалик музокарачиларнинг саъй-ҳаракатларини юқори баҳолайди.

Песков, шунингдек, Киевда Жаред Кушнер тилга олган уч томонлама музокаралар формати қайта тикланиши мумкинлигини истисно қилмади. Бироқ унинг сўзларига кўра, АҚШ воситачилигидаги эҳтимолий музокараларнинг жойи ва муддатлари ҳақида ҳозирча гапиришга эрта.

Украина президенти Володимир Зеленский эса Уиткофф ва Кушнер билан учрашув натижаларини ўз музокара гуруҳи, шунингдек, Франция, Буюк Британия ва Германия вакиллари билан муҳокама қилганини маълум қилди.

Зеленскийнинг айтишича, томонлар Украина учун ҳаво ҳужумидан мудофаа воситаларига бўлган эҳтиёж, технологик ҳамкорлик ва қиш мавсуми учун зарур ёрдам пакетини муҳокама қилган. Шунингдек, кейинги учрашувлар ва мулоқотлар бўйича қадамлар мувофиқлаштирилмоқда.

FT: учрашувларда келишувга эришилмаган

Financial Times эса манбаларига таяниб, Уиткофф ва Кушнернинг Москва ҳамда Киевдаги кўп соатлик музокаралари ҳозирча бирор аниқ натижа бермаганини ёзди.

Нашр маълумотига кўра, Трамп вакиллари учрашувларда аввал ишлаб чиқилган тинчликни тартибга солишга доир ҳужжатларнинг сўнгги ойлардаги ўзгаришлар ҳисобга олинган янгиланган вариантларини тақдим этган.

Financial Times манбалари америкалик музокарачилар кўплаб янги таклифлар билан келмаганини таъкидлаган. Асосий мақсад аввалги таклифларни қайта жонлантириш ва Москва ҳамда Киев позицияларини бир-бирига яқинлаштириш бўлган.

Москвадан кейин Киевга боришди

Уиткофф ва Кушнер 5 сентябр куни Москвада Владимир Путин билан учрашган. Оқ уй ушбу музокараларни «мазмунли» деб баҳолаган, Кремль эса Украинадаги урушни тартибга солиш билан боғлиқ вазият мураккаблигича қолаётганини билдирган.

6 сентябр куни америкалик музокарачилар Полша орқали поездда Киевга етиб борди. Бу Уиткофф ва Кушнернинг Украинадаги урушни тинч йўл билан ҳал этиш масалалари билан шуғуллана бошлаганидан буён Киевга илк ташрифи бўлди.