Малайзия қутқарув хизматининг 6 ходими дўстлари билан балиқ овлаш вақтида сув ҳавзасига тушиб кетган 17 ёшли ўсмирни қутқариш вақтида чўкиб кетди.
Қутқарувчилар қутқарув операцияси вақтида гирдобга тушиб қолишган ва мосламаларининг катта қисмини йўқотишган. Оқибатда улар ортга сузиб чиқа олишмаган, ўсмир ҳам топилмаган.
Маҳаллий полиция бошлиғининг айтишича, барча ғаввослар ўсмирни излаш вақтида хавфсизлик техникаси қоидаларига амал қилишган. Уларда шўнғиш учун мосламалар бор бўлган. Бундан ташқари, улар бир-бирлари билан занжир бўлиб боғланишган бўлган.
Сув ҳавзасидаги гирдоб кучли ёмғир сабабли ҳосил бўлган. Кучли оқим қутқарувчиларни гирдобга тортган. Эркаклар сувда ярим соатдан кўпроқ қолиб кетишган. Ғаввосларнинг ҳамкасблари уларни топишга муваффақ бўлган, аммо уларни жонлантиришнинг иложи бўлмаган.
