Трамп Қошиқчининг ўлдирилиши тушунтирилишини “тарихдаги энг ёмон чўпчак” деб атади 

АҚШ президенти Дональд Трамп Саудия Арабистони томонидан журналист Жамол Қошиқчининг ўлдирилишини “тарихдаги энг ёмон чўпчак” деб атади. 

“Уларда бошидан ёмон режа бўлган, улар уни ёмон бажаришган”, деб айтган Трамп.

АҚШ президенти журналистнинг ўлдирилиши бўйича Саудия Арабистонига нисбатан чоралар қабул қилишни конгресс ихтиёрига қолдирган, бироқ конгрессменлар қарор чиқаришдан аввал у билан маслаҳатлашиб олишлари кераклигини айтган.

Аввалроқ АҚШ вице-президенти Майк Пенс Вашингтон Қошиқчининг ўлимига алоқадорларни жазолаш зарурлигини айтган.

“Дунё кузатмоқда, америкаликлар жавобни исташмоқда ва биз уни талаб қиламиз. Бироқ бу ваҳшиёна ишда айбдорларни жазолаш талаби билан бирга буни минтақадаги миллий манфаатларимизни ҳисобга олиб амалга оширамиз”, деб айтган Пенс.

Пенс Вашингтон Ар-Риёд билан ярим асрдан ошувчи алоқаларга эгалигини эслатган ва улар АҚШ хавфсизлиги ва фаровонлиги учун муҳим аҳамиятга эгалигини айтиб ўтган.

Саудия Арабистонининг расмий баёнотига кўра, Қошиқчи Истанбулдаги консулликда чиққан можаро давомида бехосдан ўлдириб қўйилган.