«Реал»нинг ғалабали қайтиши ва «Барса»нинг иродаси. Испанияда тур воқеалари

Дам олиш кунларида Испания чемпионатида 11-тур учрашувлари давом эттирилди. Бу турда «Реал» Хулен Лопетегидан кейинги Ла Лигадаги илк учрашувини ўтказди ва «Сантьяго Бернабеу»даги 5 муваффақиятсиз учрашувдан кейин илк ғалабасига эришди.

«Реал» - «Вальядолид» - 2:0
Голлар: Винисиус Жуниор (1:0). Серхио Рамос, 88 - с пенальти (2:0).
«Реал»: Куртуа, Одриосола, Начо, Серхио Рамос, Регилон, Каземиру (Иско, 56), Кроос, Модрич, Бэйл (Васкес, 71), Бензема, Асенсио (Винисиус Жуниор, 73).
«Вальядолид»: Масип, Мойяно (Чоп, 85), Кико Оливас, Калеро, Начо Мартинес, Антоньито, Мичел, Рубен Алькарас, Вилья (Верде, 69), Суарес (Оскар Плано, 76), Энес Унал.
Огоҳлантиришлар: Асенсио, 45.
Ҳакам: Хиль Мансано (Испания).

Бу тур арафасида Испания чемпионати турнир жадвалида «Реал» «Вальядолид»дан 3 ўрин пастда эди, мадридликлар 9, «Вальядолид» эса 6-ўринда эди.

«Реал» бу ўйингача Ла Лига доирасидаги охирги 5 ўйинда ғалаба қозона олмаган, 1 бор дуранг ўйнаб, 4 марта мағлуб бўлганди. Тўплар нисбати эса 2:11 кўринишини олганди. Айниқса, «Барселона»га қарши эл-класико учрашувида йирик ҳисобдаги мағлубият (1:5) ҳаммасидан ошиб тушди. Шундай натижалардан кейин, жамоа бош мураббийи лавозимида Хулен Лопетеги ўрнини Сантьяго Солари эгаллади. «Қироллик клуби» янги мураббий бошчилигидаги илк ўйинда «Мелилья»ни ишончли ҳисобда мағлуб этди (кубок ўйинида 4:0 ҳисобидаги йирик ғалаба). Бу ўйин орқали жамоа Ла Лигадаги муваффақиятсиз серияга барҳам бериш учун яхшилаб тайёрланди.

Роналдонинг эффекти
«Реал»нинг собиқ футболчиси Роналдо «Вальядолид» акцияларининг 51 фоизини харид қилгач, бу жамоада ижобий ўзгаришлар кузатилмоқда. «Реал» очко йўқотаётган бир вақтда «Вальядолид» барқарор ўйин кўрсатиб, турнир жадвалининг юқори қисми томон ҳаракатланди. Шанба куни ҳам бу жамоа ўзининг жасоратли юришини давом эттириш мақсадида майдонга тушганди.

Ҳимоядаги муаммолар
«Реал» бу ўйиндан олдин ҳимоя чизиғида жиддий муаммоларга дуч келганди. Лазаретдаги Варан, Марсело ва Карвахаль ёнига Вальехо ҳам қўшилди. Солари «Мелилья» билан ўйинда бўлгани каби «Кастилья»дан қўшимча кучлар чақирди: Серхио Лопес, Хави Санчес, Фран Гарсия, Алекс Мартин ва Де Ле Фуэнте.

Бенземанинг имкониятларни совуриши
«Реал» ўйинни майдон эгаларига хос тарзда бошлади, 4-дақиқадаёқ Карим Бензема қулай имкониятга эга бўлганди, аммо унинг кучли зарбаси дарвоза устунидан қайтди. Биринчи бўлимда мадридликлар устунликни сақлаб қолишди.

Винисиуснинг чиқиши

Иккинчи бўлимда меҳмонлар ҳам фаоллашди, ўйинни Флорентино Переснинг ёнида Роналдо ҳам кузатиб бормоқда эди. Унал ўзини яхши томондан кўрсатди, меҳмонларнинг икки зарбаси устунга тегди, Куртуа бир неча марта жамоасини голдан қутқаришига тўғри келди.

Ўйиндаги ҳал қилувчи палла эса «Реал» сафида 18 ёшли ҳужумчи Винисиус Жуниорнинг майдонга чиқиши бўлди. У «Мелилья»га қарши ўйинда ҳам асосий ишни бажарган, икки голга ҳаммуаллифлик қилганди. У Мадриддаги ўйинда 70-дақиқада майдонга туширилди, 83-дақиқада жарима зарбасидан чиройли гол урди. Ўйин охирида Бенземани жарима майдонида йиқитишди ва Серхио Рамос пенальтидан иккинчи голни урди. Бу «Реал»нинг кейинги 6 турдаги илк ғалабаси бўлди. Энди «Реал» 6-ўринда, «Вальядолид» 9-ўринда жойлашган. Солари «Реал»нинг кейинги 50 йил ичида дебютдаги кетма-кет икки учрашувда ғалаба қозонган илк мураббийи бўлди.

«Барселона» 3 дақиқада мағлубиятни ғалабага айлантирди

«Райо Вальекано» - «Барселона» - 2:3 (1:1)
Голлар: Суарес, 11 (0:1). Посо, 35 (1:1). Альваро Гарсия, 57 (2:1). Дембеле, 87 (2:2). Суарес, 90 (2:3).
«Райо Вальекано»: Гарсия, Адвинкула, Амат, Гальвес (Веласкес, 71), Алекс Морено, Эмбарба, Комесанья, Трехо (Альваро Гарсия, 57), Имбула, Посо, Рауль де Томас (Алегрия, 65).
«Барселона»: тер Штеген, Серхи Роберто, Лангле, Пике, Жорди Альба, Ракитич, Бускетс, Артур (Видаль, 67), Рафинья (Дембеле, 52), Суарес, Коутинью (Эль-Хаддади, 67).
Огоҳлантиришлар: Амат, 6. Лангле, 17. Рауль де Томас, 49. Жорди Альба, 70. Гарсия, 89.
Ҳакам: Эрнандес Эрнандес (Испания).

Кўк-аноррангча парадокс
«Барселона» ҳали ҳам чемпионларга хос ўйинлар кўрсата олмаяпти. Жамоа қаторасига 4 учрашувда ғалаба қозона олмаганди - 3 дуранг ва бир мағлубият. Бу ўйинлардаги рақиблар «Жирона», «Леганес», «Атлетик» ва «Валенсия» каби ҳозирда кучли бўлмаган жамоалар бўлганди. Лекин кейин жамоа «Севилья» ва «Реал» каби асосий рақибларини мағлуб этди. Бу икки ғалабадаги тўплар нисбати кўрсаткичи - 9:3.

Статистика
«Райо Вальекано»га қарши сафар ўйинидаги ғалаба жамоанинг ғалабали йўлини давом эттиришидаги навбатдаги қадам бўлиши керак эди. Каталонияликлар «Кампо де Вальекас» стадионига охирги 5 ташрифида 5 ғалабага эришган (тўплар нисбати - 23:1). Умуман олганда, Мадриднинг бу жамоаси кейинги 16 ўйинда кўк-анорранглилар жамоасини енга олмаган. Статистика каталонлар бу ўйинда ҳам осонлик билан ғалабага эришишига ишора қилмоқда эди. Аслида нималар бўлди?

Класикоча таркиб
Вальверде бу ўйинга ҳам бир ҳафта муқаддам «Реал»ни йирик ҳисобда таслим этган таркибни ташлади. Ўйиннинг дастлабки 10 дақиқасидаёқ «Барселона» рақибни жарима майдонига қамаб қўйди. Ўйиндаги ҳисобни эл-класико қаҳрамони Суарес очди - Ракитич Альбани узун пас билан таъминлади, ҳимоячи эса қулай вазиятда турган уругвайлик жамоадошини голли пас билан таъминлади. Суарес биринчи бўлим охирида иккинчи голни уриши мумкин эди, аммо унинг зарбаси дарвоза устунига тегди.

«Райо»нинг жавоби
Суареснинг иккинчи имкониятидан 5 дақиқа аввал мезбонлар ҳисобни тенглаштиришганди. Қарши ҳужумда Посо аниқ ҳаракат қилди.

Иккинчи бўлим бошида жамоалар зарбалар алмашинувини амалга оширишди. Де Томаснинг ерлатиб берган зарбасини Тер Штеген оёқлари билан қайтариб юборди, Рафиньянинг узоқ бурчакни мўлжаллаб берган зарбаси хато кетди. Шу муваффақиятсизликдан кейиноқ бу футболчи ўрнига Усмон Дембеле туширилди.

Омадли алмаштириш
Франциялик футболчи ўйинга киришиб кетишга улгурмасидан жамоа иккинчи голни ўтказди, 57-дақиқада захирадан эндигина туширилган Альваро Гарсия дарвозани ишғол қилди - 2:1. Олдинда мухлисларни ёрқин футбол кутмоқда эди.

3 дақиқадаги қаҳрамонлик

Вальверде Мунир ва Видални ҳам майдонга ташлади. Аммо 87-дақиқача каталонларнинг ҳужумлари бесамар кетаверди. Аммо Дембеленинг индивидуал маҳорати ўзини кўрсатди, у ўзига берилган имкониятдан унумли фойдаланиб, совуққонлик билан ҳисобни тенглаштирди - 2:2.

Меҳмонлар бу билан тўхтаб қолишмади, 90-дақиқада Робертонинг жарима майдонига узатган тўпи Суаресга келиб тушди ва у тўпни мезбонлар дарвозаси тўрига жойлади. 3 дақиқа ичидаги 2 гол жамоа ўз ғалабали йўлида давом этишига имкон берди.

«Атлетико» ва «Валенсия»нинг муваффақиятсизлиги

«Леганес» – «Атлетико» – 1:1 (Каррильо, 82 – Гризманн, 69)

Мадридликлар биринчи бўлимда гол ўтказмаслик анъанасини давом эттирди. Аммо бу «матрасчилар»ни мақташ учун етарли эмас, шанба оқшомидаги ўйинда Гризманнинг чиройли голи ҳам жамоага ғалаба келтира олмади. Ўйин охирида мезбонлар одатдаги каби стандарт вазиятдан гол уриб, мағлубиятдан қутулиб қолишди. Диего Симеоне «Атлетико» бошқарувидаги энг ёмон стартни қайд этмоқда - 11 турда 20 очко ва учинчи ўрин. Бошқа кучли жамоаларда ҳам мавсум муваффақиятсиз кечаётгани туфайлигина «Атлетико» кучли учликдаги ўрнини сақлаб қолган.

«Валенсия» - «Жирона» – 0:1 (Пере Понс, 48)

Ўтган мавсумда кучли тўртликда юрган, «Барселона»нинг асосий таъқибчиси бўлган «Валенсия» таркибни тарк этган асосий футболчилари ўрнини тўлдира олмади. Жамоа бу турда «Месталья»да кучсиз рақибга ютқазди ва 1957 йилдан буён энг ёмон стартни қайд этди. Жамоа 11 турда фақат 1 ғалабага эришган ва 8 дуранг туфайли 11 очко тўплаб, 15-ўринда жойлашган.

«Севилья»нинг иккинчи ўрни

«Реал Сосьедад» – «Севилья» – 0:0

«Севилья» бош мураббийи Пабло Мачин бу ўйин арафасида ҳужум чизиғида муаммоларга дуч келди. Асосий ҳужумчилар Бен Йеддер ва Андре Сильва жароҳат туфайли сафдан чиққан, шу туфайли Куинси Промес ҳужумдан жой олди. Нидерландиялик футболчи янги амплуага мослаша олмади ва 90 дақиқа давомида рақиб дарвозаси томон бирор марта ҳам зарба йўллай олмади. Ўйиндаги энг қулай вазиятни Роке Меса қўлдан бой берди. Бу голсиз дурангдан кейин «Севилья» иккинчи ўринга кўтарилди. Жамоа «Атлетико» ва «Алавес» билан бир хил миқдорда очко тўплаган, аммо тўплар нисбати устунлиги эвазига юқорироқда жойлашган. Андалусияликларни душанба куни ўз ўйинини ўтказадиган «Эспаньол» қувиб ўтиши мумкин. Бунинг учун, каталонияликлар «Атлетик»ни мағлуб этиши талаб қилинади.

Тур ўйинлари

Турнир жадвали.