Samsung мослашувчан экранли смартфонини намойиш қилди

Фото: Twitter

Samsung иккига буклаш мумкин бўлган смартфон прототипини намойиш қилди. Тақдимот 7 ноябрь куни ишлаб чиқарувчилар конференциясида бўлиб ўтди. YouTube’да жонли трансляция узатилди.

Мослашувчан дисплей Infinity Flex технологиясида ишланган бўлиб, экран диагонали очиқ ҳолатида 7,3 дюймни ташкил қилади. Samsung яқин ойларда мослашувчан дисплейларни оммавий ишлаб чиқаришга старт беришни режалаштирмоқда.

Видеода Samsung вакили номсиз смартфонни намойиш қилди. У қурилманинг расмий тақдимот санасига аниқлик киритмади, фақат бу тез орада кутилаётганини қайд этди. CNBC маълумотига кўра, Google’нинг Android ишланмалар бўйича президенти Дэйв Берк мослашувчан экранли Samsung смартфони 2019 йилда тақдим этилишини айтган.