Бухоролик ногиронлиги бор аёлнинг бошпанаси йўқ. Лекин у ҳокимлик таклифларини рад этмоқда

Ўзбекистонда имконияти чекланганларнинг ижтимоий муҳофаза қилиниши масаласи доимо эътиборда бўлиб келган. Хусусан, ногиронлиги бўлган шахсларнинг турмуш даражаси ва сифатини янада яхшилаш, уларга тиббий-ижтимоий ёрдам кўрсатиш, ҳуқуқлари, эркинликлари ва қонуний манфаатларини рўёбга чиқаришга, жамиятдаги фаол позициясини шакллантиришга кўмаклашиш юзасидан чора-тадбирлар мунтазам равишда амалга оширилади. Бу борада бир нечта қарор ва фармон ҳам қабул қилинган.

Президентнинг 2017 йил 1 декабрдаги «Ногиронлиги бўлган шахсларни давлат томонидан қўллаб-қувватлаш тизимини тубдан такомиллаштириш чора-тадбирлари тўғрисида»ги фармонида ҳам бу борада бир қатор вазифалар белгиланган.

Айниқса, сўнгги йилларда ногиронлиги бўлган шахсларни уй-жой билан таъминлашга жиддий эътибор қаратилмоқда. Уйга муҳтож бўлган бундай шахслар давлат томонидан бепул ва арзон уй-жойлар билан таъминлаб келинмоқда.

Албатта, уйга муҳтож ногиронлиги бўлган шахсларнинг ҳаммасини бир вақтда уй-жой билан таъминлаб бўлмайди. Шу боис, бу борада чора-тадбирлар босқичма-босқич амалга ошириб келинмоқда. Аниқроқ қилиб айтадиган бўлсак, уйлар навбати билан берилмоқда.

Шу билан бирга, ногиронлиги бўлган шахслар орасида кўрсатилаётган эътибордан қониқмаётган, норози, ҳокимликлар билан ўртасида турли тушунмовчилик ҳолатлари юзага келган кишилар ҳам йўқ эмас.

Kun.uz таҳририятига Бухоро вилояти, Бухоро шаҳрида яшовчи II гуруҳ ногирони, 52 ёшли Рисолат Тоҳировадан тушган мурожаат айнан шу мазмунда.

Рисолат Тоҳирова ўз мурожаатида ёлғиз аёллиги, бошпанаси йўқлиги, уй-жойга муҳтожлиги ва Бухоро шаҳар ҳокимлиги ҳамда мутасадди ташкилотлар томонидан унга бу борада кўмак берилмаётганини билдирган.

Мурожаатчи билан учрашиб, унинг бу борадаги эътирозларини тингладик.

Рисолат Тоҳирова Ғиждувон туманида туғилган. 1998 йилгача собиқ «Бухоротекс» АЖда ишлаб келган. Соғлиги ёмонлашгани туфайли унга II гуруҳ ногиронлиги берилган ва корхона билан меҳнат шартномаси бекор қилинган. 2003 йилдан ногиронлиги муддатсиз этиб белгиланган. Корхонада ишлаган даврида Тоҳирова корхонага қарашли 5 «А»-сонли оилавий ётоқхонада яшаган ва доимий рўйхатга қўйилган.

Меҳнат шартномаси бекор қилингандан кейин корхонага тегишли ётоқхонадан чиқарилган ва Ғиждувон туманида онаси билан бир муддат яшаган.

Корхона тугатилгандан кейин унга тегишли оилавий ётоқхона Бухоро шаҳар ҳокимлиги тасарруфига ўтган. Ётоқхонадаги хоналар уйга муҳтож кишиларга берилган. Айни вақтда Тоҳирова доимий рўйхатдан ўтган ётоқхонадаги хонадонда бошқа оила яшаб келмоқда.

Бошпанасиз қолган аёл уй-жой сўраб, Бухоро шаҳар ҳокимлиги ва бошқа мутасадди ташкилотларга мурожаат қилган. Доимий рўйхатда турган ётоқхонадаги хонадон унга қайтадан берилиши белгиланган тартибда рад қилинган.

Ушбу ҳолат юзасидан Бухоро шаҳар ҳокимлиги мутасаддилари билан суҳбатлашдик.

«Рисолат Тоҳировага имкон даражасида ёрдам бермоқдамиз. Бухоро шаҳридаги мавжуд ётоқхоналарда унга яшаш учун жой ажратдик. Афсуски, у барчасини рад этди», – дейди Бухоро шаҳар ҳокимлиги хотин-қизлар қўмитаси бош мутахассиси Нодира Нуриддинова.

Ҳокимликнинг уй-жойларни ҳисобга олиш ва нотурар жойлардан фойдаланиш давлат корхонаси бош мутахассиси Равшан Саидаҳмедов вазиятга ойдинлик киритди.

Унинг айтишича, Рисолат Тоҳированинг уй-жой масаласидаги мурожаати инобатга олиниб, Бухоро шаҳар ҳокимлигининг уй-жойларни ҳисобга олиш ва нотурар жойлардан фойдаланиш давлат корхонаси томонидан уй-жой билан таъминлаш бўйича юритиладиган фуқароларнинг навбатига 2017 йил 25 декабрда олинган. Навбат асосида Бухоро шаҳар Қ.Муртозоев кўчаси 16 –уй манзилида жойлашган оилавий ётоқхонанинг 15-хонаси Р.Тоҳировага яшаш учун берилган. 2018 йил 25 январда Р.Тоҳирова томонидан бу жой етарли шароитлар йўқлиги важи билан рад қилинган. Бу бўйича тегишли далолатномалар тузилган.

Рисолат Тоҳированинг уй-жой масаласидаги такрорий мурожаатидан сўнг унга Бухоро шаҳар ҳокимлиги томонидан 2018 йил 17 март куни Бухоро шаҳар, Алпомиш кўчаси 5 К/1-уй манзилида жойлашган оилавий ётоқхонанинг 20-секциясидан 52-хона яшаш учун ажратилган. Ушбу хонада яшаш ҳуқуқини берувчи 5 К/1-206-сонли ордер 2018 йилда унга тақдим этилган. Р.Тоҳирова ҳокимликдан фуқаролик паспорти рўйхатга қўйилган уй-жойни талаб қилган ҳолда ушбу турар жойни ҳам рад қилган. Унга бунинг имкони йўқлиги тушунтирилган.

Р. Тоҳирова 2018 йил 14 сентябрь куни унга бошқа оилавий ётоқхона ажратилгандан кейин рад қилган ҳолда ётоқхоналардан жой керакмаслиги, Бухоро шаҳар 7-микрорайондан қурилаётган янги уйлардан бири ажратилиши кераклигини билдириб, тилхат ёзиб берган.

Бухоро шаҳар ҳокимлиги мутасаддилари Р.Тоҳированинг янги уйлар учун тўлов қобилияти йўқлиги, оилавий ётоқхоналардан унинг учун бепул берилган хонадонлар рад этилаётгани сабабли шу каби тушунмовчиликлар юзага келганини билдирди.

Р.Тоҳирова бу масалада Бухоро вилоят ҳокими қабулида ҳам бўлиб, ёрдам сўрайди. Унинг мурожаати 2018 йил 6 ноябрь куни вилоят ҳокими  ўринбосари, Хотин-қизлар қўмитаси раиси Ф.Ибрагимова томонидан ўрганиб чиқилади ва унга оилавий ётоқхонлардаги хонадонлардан барча шароитлар яратиб берилиши таклиф қилинади. Аммо бу таклиф Р.Тоҳирова томонидан рад этилади. Бу ҳолат юзасидан тегишли далолатнома ҳам тузилади.

Ўрганиш давомида юқоридаги ҳолатлар аниқланар экан, ким ҳақу ким ноҳақлигига етарлича хулосага қилинди. Афсуски, айрим фуқароларда давлат томонидан яратиб берилаётган шароитларга қаноат қилмаслик ва маҳаллий ҳокимлик вакилларига нисбатан асоссиз равишда ишончсизлик билдириш ҳолатлари учрамоқда.

Бардошбек САМАД ўғли,
Kun.uz мухбири.