Трамп АҚШдаги муҳожирлар фарзандларининг ўлимида демократларни айблади

АҚШ президенти Дональд Трамп Америкага ўз ота-оналари - ноқонуний муҳожирлар билан келган болаларнинг ўлимида АҚШ ҳукуматига Мексика билан чегара ҳудудида девор қуришга қарши чиқаётган Демократик партия вакиллари айбдор, деб ҳисоблайди. Оқ уй раҳбари ўзининг Twitter'ида АҚШнинг жанубий чегараси яқинидаги мигрантлар яшовчи марказлардаги икки ўлими ҳолатига изоҳ берар экан, шундай баёнот берди. 

«Чегара яқинида болалар ёки бошқа одамларнинг ўлими билан боғлиқ ҳар қандай ҳолатлар демократлар виждонига ҳавола ва уларнинг миграцион сиёсати натижасидир, зеро бундай сиёсат уларга бизнинг мамлакатимизга ноқонуний кириб келиш мумкинлигига ишонч бериб, катта йўлни босиб ўтишга имкон беради. Улар эса бундай қила олишмайди. Агар ўртада девор бўлганида эди, улар бунга ҳатто ҳаракат ҳам қилмаган бўлар эди!» – дейди президент. 

«Ҳаётдан кўз юмган икки бола чегарачиларга етиб келишдан олдин касал бўлган. Боланинг отаси бу чегарачиларнинг айби эмаслигини айтган, у болага бир неча кун ҳатто сув ҳам бермаган. Чегара назорати учун девор керак, шундагина бундай ҳолатларга чек қўйилади», – деб ҳисоблайди Трамп. 

АҚШ-Мексика чегарасини отаси билан бирга ноқонуний кесиб ўтишга уриниш вақтида қўлга олинган 8 ёшли гватемалалик бола 25 декабрга ўтар кечаси вафот этган. Қўшма Штатлар божхона-чегара хизматидан маълум қилинишича, 24 декабрь куни Нью-Мексико штатидаги шифохоналардан бирида боланинг аҳволи ёмонлашган, унга юқори ҳарорат билан кузатилган шамоллаш ташхиси қўйилган. Унга дори-дармон белгилаб, шифохонадан рухсат беришган, бироқ шундан кейин боланинг аҳволи ёмонлашган ва уни яна тиббиёт муассасасига етказишга тўғри келган, тез орада у шифохонада ҳаётдан кўз юмган. 

Бундан олдин ҳам АҚШнинг Мексика билан чегарасидаги мигрантлар марказида жойлашган 7 ёшли гватемалалик қиз вафот этган эди. БМТнинг мигрантлар муаммолари билан шуғулланувчи махсус маърузачиси Гонсалес Моралес АҚШ ҳукуматини унинг ўлими сабабларини яхшилаб ўрганишга чақирди. Шунингдек, у Вашингтондан болаларни бундай марказларга жойлаштиришни тўхтатишни талаб қилди.