Африкада Германия ҳукуматининг самолёти ишдан чиқди

Фото: Global Look Press/Rainer Jensen

Германия ҳукуматининг яна бир самолёти ишдан чиқиши натижасида немис вазири Африка бўйлаб сафарини кечиктиришига тўғри келди. Бу ҳақда Deutsche Welle хабар бермоқда.

Нашрнинг ёзишича, ҳаво кемаси двигателида носозлик юзага келиши оқибатида Германия иқтисодий ҳамкорлик ишлари бўйича вазири Герд Мюллер Малавидан Замбияга учиб кета олмаган.

Вазирнинг матбуот котиби Twitter саҳифасида самолёт бузилиб қолганлигини тасдиқлади.

Ўтган йилнинг ноябрида Германия канцлери Ангела Меркелнинг самолёти Аргентинага парвоз қилаётиб техник носозлик туфайли Кёльнга қайтишига тўғри келганди. Натижада Меркель Буэнос-Айресдаги G20 саммитига оддий рейсда парвоз қилганди.